BJP સાંસદનું હાસ્યાસ્પદ નિવેદન, કહ્યું- કાદવમાં બેસીને શંખ ફૂંકશો તો વધશે ઈમ્યુનિટી નહીં થાય કોરોના

રાજસ્થાનમાં કોરોના દર્દીઓનો આંકડો 61 હજારને પાર થઇ ગયો છે, ત્યારે ભાજપના સાંસદ સુખબીરસિંહ જૈનપુરિયાનો એક વીડિયો સોશિયલ મીડિયા પર વાયરલ થઈ રહ્યો છે, જેમાં તેઓ કોરોનાથી બચવાનો એક વિચિત્ર ઉપાય બતાવી રહ્યાં છે. ભાજપના સાંસદે હાસ્યાસ્પદ નિવેદન આપતા કહ્યું કે, કાદવમાં બેસીને શંખ ફૂંકશો તો વધશે ઈમ્યુનિટી નહીં થાય કોરોના.

રાજસ્થાન: દેશભરમાં કોરોનાનો કહેર યથવત છે, સરકાર તેનાથી બચવા તમામ પગલા લઈ રહી છે. લોકો પણ પોતાની ઇમ્યુનિટી વધારવા માટે નવા નવા પ્રયોગો કરી રહ્યાં છે. આ દરમિયાન રાજસ્થાનમાં ભાજપના સાંસદ સુખબીરસિંહ જૈનપુરિયાએ કોરોનાથી બચાવવાની એક અજીબોગરીબ રીત જણાવી છે.

રાજસ્થાનના ટોંક-સવાઇમાધોપુર સંસદીય ક્ષેત્રના સાંસદ સુખબીરસિંહ જૈનપુરિયાએ કોરોનાને હરાવવાનો દાવો કર્યો છે. જેમનો એક વીડિયો સોશિયલ મીડિયામાં વાયરલ થયો છે. આ વાયરલ થયેલા વીડિયોમાં સાંસદ સુખબીરસિંહ જૈનપુરિયા પોતાના ફાર્મહાઉસના કાદવમાં બેઠા છે, વરસાદમાં પલાળીને શંખ વગાડતા જોવા મળે છે. આમ, સાંસદે દાવો કર્યો છે કે, કાદવમાં બેસીને શંખ વગાડવાથી રોગપ્રતિકારક શક્તિ વધે છે અને કોરોના પણ નહીં થાય.