મમતા બેનર્જીએ નામ લીધા વગર ઓવૈસીને આડે હાથે લીધા, ઓવૈસીનો પલટવાર

કોલકત્તા: પશ્ચિમ બંગાળના મુખ્યપ્રધાન મમતા બેનર્જીએ ઓવૈસીના નામનો ઉલ્લેખ કર્યા વગર અસદુદ્દીન ઓવૈસીને આડે હાથ લીધા હતાં. મમતા બેનર્જીએ કહ્યું હતું કે, તેમની ભાગલાવાદી નીતિઓથી ખતરો ઉભો થઈ રહ્યો છે. ઓવૈસીએ પણ પલટવાર કરતા નિવેદન આપ્યુ હતું કે, તેમના રાજ્યના મુસ્લિમો ખુશ નથી. એટલે જ બંગાળમાં ભાજપે 18 બેઠકો જીતી હતી.

પશ્ચિમ બંગાળના કૂચ બિહાર વિસ્તારમાં સભાને સંબોધિત કરતા મમતા બેનર્જીએ કહ્યું હતું કે, ' જે રીતે હિન્દુઓમાં કટ્ટરપંથી છે. એ જ રીતે લઘુમતીઓમાં પણ કેટલાક કટ્ટરપંથીઓ છે. જે લોકો ભાજપ પાસેથી પૈસા મેળવે છે. એ લોકો અહીં નથી રહેતા. તેઓ હૈદરાબાદમાં રહે છે. એ લોકો અહીં આવશે અને કહેશે કે, તમને સુરક્ષા આપીશું'

મમતા બેનર્જીએ નામ લીધા વગર ઓવૈસી પર સાધ્યુ નિશાન

મમતાએ કહ્યું કે' હું લઘુમતી ભાઈઓને અપીલ કરું છું કે તેઓ તેમની જાળમાં ન ફસાઈ' આ રીતે તેમણે ઓવૈસી સહિત ભાજપની પણ ઝાટકણી કાઢી હતી.

આ નિવેદન બાદ ઓવૈસીએ પણ પલટવાર કર્યો હતો. ઓવૈસીએ વળતો જવાબ આપતા કહ્યું હતું કે, બંગાળમાં જ મુસ્લિમોની સ્થિતિ ખરાબ છે. વિકાસ સૂચકાંકના મુદ્દે ત્યાંના મુસલમાન પછાત છે'

ઓવૈસીએ ટ્વીટ કરીને લખ્યુ હતું કે, 'જો દીદી હૈદરાબાદના આ વર્ગના લોકોથી ડરતા હોય તો તેઓ જવાબ આપે કે, ભાજપને 18 બેઠકો કેવી રીતે મળી ગઈ'.