સુરત: જિલ્લામાં વધુ એક વ્યક્તિનું શંકાસ્પદ હાલતમાં મોત થયાની ઘટના સામે આવી છે. જેને લઇને પોલીસ દોડતી થઇ ગઇ છે. સુરત જિલ્લાના છેવાડે આવેલ મહુવા તાલુકામાં માલીબા કોલેજમાં એક વિદ્યાર્થીનું અગાસી પરથી પડી જવાથી મોત નિપજ્યું છે. માલીબા કોલેજ ખાતે આવેલ બોઇઝ હોસ્ટેલમાં રહીને ધોરણ 11 માં ભણતો 16 વર્ષીય વિદ્યાર્થી બીજા માળેથી પડી જતા તેનું પ્રાણ પંખીડું ઉડી ગયું હતું. આશાસ્પદ યુવક અને વ્હાલસોયા દીકરાના મોતને લઈને પરિવાર શોકમાં ડૂબી ગયો છે. વિદ્યાર્થીએ આપઘાત કર્યો કે પછી અકસ્માતે પડી ગયો તે બાબતે મહુવા પોલીસ દ્વારા તપાસનો ધમધમાટ શરૂ કરી દેવામાં આવ્યો છે.
સુરત જિલ્લાના મહુવા પોલીસની હદમાં આવેલ માલીબા કોલેજના બોઇઝ હોસ્ટેલમાં રહીને અભ્યાસ કરતો ડાંગ જિલ્લાનો 16 વર્ષીય અજયનાથ જનકભાઈ ગાવિત ધોરણ 11માં અભ્યાસ કરતો હતો. અજય બોઇઝ હોસ્ટેલના કેમ્પસમાં બીજા માળેથી પડી ગયો હતો. જેમાં તેને ગંભીર ઈજાઓ થઇ હતી. બીજી તરફ તેને તાત્કાલિક સારવાર અર્થે હોસ્પીટલ લઈ જવાયો હતો, જ્યાં ફરજ પર હાજર તબીબોએ વિદ્યાર્થીને મૃત જાહેર કર્યો હતો.
વિધાર્થીના પરિવારજનોને જાણ કરતા તેઓ પણ હોસ્પિટલ દોડી આવ્યા હતા અને દીકરાના મોતને લઈને પરિવાર શોકમાં ગરકાવ થઇ ગયો હતો. વિદ્યાર્થીએ આપઘાત કર્યો કે પછી તે અકસ્માતે પડ્યો તે મામલે પોલીસે તપાસ હાથ ધરી છે.
આ પણ વાંચો:
