બનાસકાંઠા: પાલનપુરના ચિત્રાસણી નજીક ખેમાણા ટોલ પ્લાઝા ખાતે કાર ચાલક ટોલ ટેક્સ ભરી રહ્યો હતો. ત્યારે અચાનક પાછળથી પૂરપાટ ઝડપે આવતી એક ટ્રકે કારને પાછળથી ટક્કર મારી હતી અને ત્યારબાદ 500 મીટર સુધી આ કારને ધસડી હતી. કંપારી છોડાવી દેનારા આ અકસ્માતના સીસીટીવી ફૂટેજ પણ સામે આવ્યા છે. સમગ્ર ઘટના સીસીટીવી કેમેરામાં કેદ થઈ જતા તેમાં રાજસ્થાન તરફથી આવતી એક ટ્રક પુરપાટ ઝડપે ટોલ પ્લાઝા પર ઉભેલી કારને ધસડી પસાર થતી જોવા મળી રહી છે.
કારચાલકનો થયો બચાવ: આંખના પલકારામાં જ આ અકસ્માત સર્જાતા લોકો પણ ચોકી ગયા હતા. અકસ્માત સર્જાયા બાદ લોકો પણ આ ટ્રક પાછળ દોડ્યા હતા અને કારચાલકને બચાવવા માટે લોકોના ટોળેટોળા ઊમટી પડ્યા હતા. જો કે સદનસીબે આ ઘટનામાં કાર ચાલકનો આબાદ બચાવ થયો હતો. લોકોએ કારમાં ફસાયેલા કારચાલકને મહામહેનતે બહાર કાઢ્યો હતો. ઘટનામાં કાર ચાલકનો જીવ બચી જતા હાજર લોકોએ પણ રાહતનો શ્વાસ લીધો હતો.
પોલીસે શરૂ કરી તપાસ: ઘટનાની જાણ તાલુકા પોલીસને કરવામાં આવતા તાલુકા પોલીસ તાત્કાલિક ઘટના સ્થળે પહોંચી હતી અને સમગ્ર ઘટનામાં તપાસ કરવામાં આવતા પ્રાથમિક તપાસમાં એવું સામે આવ્યું છે કે ટ્રકની બ્રેક ફેલ થઈ હતી જોકે હાલ તો તાલુકા પોલીસે સમગ્ર મામલે આગળની તપાસ આરંભી છે. આ અકસ્માતમાં કાર માલિકને મોટું નુકસાન સહન કરવાનો વારો આવ્યો છે.
આ પણ વાંચો:
