અમદાવાદઃ ચૂંટણીનું કાઉન્ટડાઉન શરૂ થઈ ગયું છે. 97 સંવેદનશીલ કેન્દ્ર મળી કુલ 321 મતદાન મથકો પર બુધવારે 13મી નવેમ્બરે વાવ વિધાનસભાની પેટાચૂંટણી માટે મતદાન થવાનું છે. ત્યારે વાવ બેઠક પર એક પછી એક મત પડવાના શરૂ થવાને હવે ગણતરીના કલાકો બાકી રહ્યા છે. મતદારો આ સમય દરમિયાન ઉમેદવારોના ભાવીનો ફેંસલો કરશે.
07-વાવ વિધાનસભા બેઠક માટે પેટાચૂંટણી માટે તા. 13 નવેમ્બર, 2024 એટલે કે બુધવારે મતદાન યોજાશે. વાવ વિધાનસભા મતદાર વિભાગ માટે ભરાયેલા કુલ 21 ઉમેદવારો પૈકી ચકાસણી અને ફોર્મ પાછા ખેંચાવાની પ્રક્રિયા બાદ કુલ દસ (10) ઉમેદવારો વચ્ચે યોજાનાર ચૂંટણીમાં 3.10 લાખ મતદારો પોતાના મતાધિકારનો ઉપયોગ કરશે.
ગુજરાતની વાવ વિધાનસભા મતવિસ્તારના વિવિધ 192 મતદાન મથક કેન્દ્રો પર આવેલા કુલ 321 પોલીંગ સ્ટેશન પર સવારે 07.00 થી સાંજના 06.00 કલાક સુધી મતદાન યોજાશે. જેના માટે 321 બેલેટ યુનિટ, 321 કંટ્રોલ યુનિટ અને 321 વીવીપેટનો ઉપયોગ કરવામાં આવશે. મતદાન મથકો ખાતે કુલ 1412 જેટલા અધિકારીઓ/કર્મચારીઓ ફરજ બજાવશે. વાવ વિધાનસભાની ચૂંટણીમાં 1,64,296 પુરૂષ અને 1,49,478 સ્ત્રી ઉપરાંત 01 થર્ડ જેન્ડર મળી કુલ 3,10,775 મતદારો પોતાના મતાધિકારનો ઉપયોગ કરી શકશે. આ બેઠક પરના મતો તા. 23 નવેમ્બર, 2024ના રોજ મતગણતરી બાદ પરિણામની જાહેરાત કરવામાં આવશે.
