જામનગર : મેયર વિનોદ ખીમસુરીયાના અધ્યક્ષ સ્થાને કુંવરબાઈ જૈન ધર્મશાળામાં જામનગર મહાનગરપાલિકાની ખાસ સામાન્ય સભા યોજાઈ હતી. જેમાં ડેપ્યુટી મેયર ક્રિષ્નાબેન સોઢા, મ્યુનિ. કમિશનર ડી. એન. મોદી ઉપરાંત અધિકારીઓ-પદાધિકારીઓ અને કોર્પોરેટરો ઉપસ્થિત રહ્યા હતા. સીધી ભરતી/બઢતીના રિક્રૂટમેંટ નિયમો મંજૂર કરવા અંગેની કમિશનની દરખાસ્ત અને વિપક્ષના કોર્પોરેટરે ચર્ચામાં ભાગ લીધો હતો.
વિપક્ષ દ્વારા વેધક સવાલ : જેનબબેન ખફીએ જણાવ્યું હતું કે, એક દરખાસ્ત માટે આટલી ઉતાવળે અને ખાસ સામાન્ય સભા બોલાવવાની શું જરૂર હતી ? દર વખતે અલગ અલગ જગ્યાએ સામાન્ય સભા બોલાવવાથી આવી જગ્યાના ભાડા ભરવા પડે છે. તો પછી નિયત સમયે મળતી સામાન્ય સભામાં આ દરખાસ્તોને કેમ લાવવામાં આવતી નથી ? શું ફક્ત એક જ એજન્ડા પૂરતી સામાન્ય સભા બોલાવવામાં આવી છે ? આ યોગ્ય નથી તેમ જણાવી તેઓએ સામાન્ય સભામાંથી વોક આઉટ કર્યું હતું.
કર્મચારીઓની નિમણુંક અંગે ચર્ચા : કોર્પોરેટર રાહુલ બોરીચાએ ચર્ચામાં ભાગ લેતા જણાવ્યું હતું કે, રોસ્ટરના નિયમોની અમલવારી થતી નથી, નિયમનો પાલન થતું નથી અને લાગવગના ધોરણે બઢતી આપવામાં આવે છે. રચનાબેન નંદાણીયા એવી રજૂઆત કરી હતી કે, જે તે વિભાગમાં નિષ્ણાત અધિકારી/ કર્મચારીને જ નિમણૂક આપવી. આખરે 35 કર્મચારીઓ 11 માસના કોન્ટ્રાક્ટ પદ્ધતિના ધોરણે વર્ષોથી ફરજ બજાવે છે. તેનો પણ આમાં સમાવેશ કરવો જોઈએ.
અધિકારીઓની જવાબદારી પર પ્રશ્ન : અસ્લમ ખીલજીએ ચર્ચામાં ભાગ લેતા જણાવ્યું હતું કે, ભરતી પ્રક્રિયાનો કોઈ વિરોધ નથી, પરંતુ અતિવૃષ્ટિએ શહેરના લોકોની દશા અને દિશા બગાડી નાખી હતી. આજે પણ વોર્ડ નંબર 12 ના અનેક વિસ્તારમાં લોકોના ઘરમાં ગંદા પાણી ભર્યા છે. તે બાબતે પણ તંત્રએ વિચારવું જોઈએ. પાંચ દિવસનું કામ 25 દિવસે પણ પૂરું નથી થતું. આથી બેદરકાર અધિકારીઓ સામે યોગ્ય પગલાં લેવા જોઈએ એવી માંગણી કરી હતી.
