જૂનાગઢ: રાજ્યમાં છેલ્લા ત્રણ - ચાર દિવસથી ગરમીનો પારો ઉંચકાઈ રહ્યો છે. બે દિવસ દરમિયાન સૌરાષ્ટ્ર કચ્છ અને ગુજરાતના કેટલાક જિલ્લાઓમાં આકરી ગરમી પડશે તેવી સંભાવનાઓ હવામાન વિભાગે વ્યક્ત કરી છે. ઉનાળાની શરૂઆતમાં જ લોકોને ભારે ગરમીનો અહેસાસ થઈ રહ્યો છે. આગામી બે દિવસો દરમિયાન સૌરાષ્ટ્ર - કચ્છ અને ગુજરાતના કેટલાક વિસ્તારોમાં ગરમીનું પ્રમાણ વધી શકે છે. દિવસ દરમિયાન તાપમાનનો પારો 40 ડિગ્રીને પાર કરે તેવી પણ પૂરી શક્યતાઓ છે.
અલીનીનોની અસરને કારણે વધુ ગરમી:
આ વર્ષને અલનીનોના વર્ષ તરીકે પણ ઓળખવામાં આવે છે. જેની વિપરીત અસરો શિયાળા દરમિયાન જોવા મળી. સામાન્ય રીતે પાછલા બે દસકા કરતાં પણ વધુના સમય પછી શિયાળાના દિવસો દરમિયાન ઠંડીનું પ્રમાણ બિલકુલ નહીવત જોવા મળ્યું હતું. હવે ઉનાળાની શરૂઆતના આ દિવસો ખૂબ જ ગરમ બની રહ્યા છે જેને કારણે ઉનાળામાં આકરી અને અંગ દઝાડતી ગરમી પડી શકે છે.
જેમ જેમ ઉનાળો આગળ વધતો જશે તેમ તેમ દિવસ અને રાત્રિના તાપમાનમાં પણ નોંધપાત્ર વધારો થતો જોવા મળશે. ખાસ કરીને દિવસના તાપમાનમાં ખૂબ અને અસહ્ય વધારો થતો જોવા મળી શકે છે. ઉનાળાની શરૂઆતના દિવસે દિવસનું તાપમાન 40 ડિગ્રીને પાર કરી ગયું છે હજુ આખા ઉનાળાનો સમયગાળો બાકી છે ત્યારે આવનારા આ દિવસો ગરમીની દ્રષ્ટિએ કદાચ ઐતિહાસિક પણ નોંધાઈ શકે છે.
