અમદાવાદ: સરકારી નોકરીનું સપનું જોતા યુવાઓ માટે મહત્વપૂર્ણ અને ઉપયોગી સમાચાર આવ્યા છે. ગુજરાત જાહેર સેવા આયોગ (GPSC)એ ક્લાસ-1 અને 2 તથા ક્લાસ-3ની વિવિધ પરીક્ષાઓ માટેના જુદા જુદા અભ્યાસક્રમમાં ફેરફાર કરીને તમામ માટે હવે એક સામાન્ય અભ્યાસક્રમ તૈયાર કર્યો છે. જેથી ઉમેદવારોને એકથી વધુ ભરતી પરીક્ષા માટે અલગ-અલગ તૈયારી ન કરવી પડે. GPSC દ્વારા આ અંગે જાણકારી આપવામાં આવી છે.
દરેક પરીક્ષા માટે એક જ તૈયારી
સરકારી ભરતી માટે GPSC દ્વારા ક્લાસ-1થી લઈને ક્લાસ-3 સુધીની વિવિધ ભરતી માટે પરીક્ષા લેવાતી હોય છે. જેમાં સામાન્ય અભ્યાસનો અભ્યાસક્રમ થોડા ફેરફારો સાથે જુદો જુદો હોય છે. જોકે જુદી જુદી પરીક્ષાઓ આપતા ઉમેદવારોને આ કારણે દર વખતે અલગ તૈયારી કરવી પડતી હોય છે. આથી સામાન્ય અભ્યાસ વિષયનો નવો અભ્યાસક્રમ જાહેર કરાયો છે. જેથી ઉમેદવારોને નવી ભરતીની જાહેરાત બાદ નવા અભ્યાસક્રમની રાહ ન જોવી પડે અને તેઓ પહેલાથી આ માટે તૈયારી કરી શકે.
નવા અભ્યાસ ક્રમમાં કયા-કયા ટોપિકનો સમાવેશ
આ સામાન્ય અભ્યાસમાં ઈતિહાસ અને સંસ્કૃતિ, ભારતીય રાજ્ય વ્યવસ્થા, બંધારણ, સામાજિક ન્યાય અને આંતરરાષ્ટ્રીય સંબંધો, તાર્કિક અને બૌદ્ધિક ક્ષમતા, ભારત અને ગુજરાતનું અર્થતંત્ર, ભૂગોળ, વિજ્ઞાન અને ટેકનોલોજી, સામાન્ય જ્ઞાન તથા પ્રાદેશિક, રાષ્ટ્રીય અને આંતરરાષ્ટ્રીય કક્ષાની મહત્વની સાંપ્રત ઘટનાઓનો સમાવેશ થાય છે.
આ પણ વાંચો:
