સુરત : સુરત શહેરમાં કાપોદ્રા પોલીસે ડ્રોન કેમેરાથી સર્વેલન્સ કરીને બે ઇસમોને ગાંજા સાથે ઝડપી પાડ્યા છે. પોલીસે 3,480 રૂપિયાની કિંમતનો 348 ગ્રામ ગાંજો જપ્ત કરી આ મામલે કાયદેસરની કાર્યવાહી હાથ ધરી છે.
ડ્રોન કેમેરાથી સર્વેલન્સ : સુરતમાં પોલીસ દ્વારા નો ડ્રગ્સ ઈન સુરત સીટી અભિયાન ચલાવવામાં આવી રહ્યું છે. સુરત શહેરમાં કાપોદ્રા પોલીસે ગાંજા સાથે બે ઇસમોને ઝડપી પાડ્યા છે. કાપોદ્રા ચાર રસ્તા DGVCL ઓફિસની સામે ખુબ જ ભીડભાડ વાળી જગ્યામાં ગાંજો વેચતો હોવાની બાતમી મળતા કાપોદ્રા PI એમ. બી. ઔસુરાના માર્ગદર્શન હેઠળ પોલીસે ડ્રોન કેમેરાથી સર્વેલન્સ હાથ ધર્યું હતું.
બે આરોપી ઝડપાયા : ડ્રોન કેમેરાથી સર્વેલન્સ દરમિયાન કાપોદ્રા પોલીસે 36 વર્ષીય હિમત સામજીભાઈ હડિયા અને 19 વર્ષીય નીતિન ધીરુભાઈ ચાવડાને ઝડપી પાડ્યા હતા. પોલીસે આરોપી પાસેથી 3,480 રૂપિયાની કિંમતનો 348 ગ્રામ ગાંજો જપ્ત કર્યો હતો. આ મામલે બંને શખ્સ વિરુદ્ધ ગુનો નોંધી કાયદેસરની કાર્યવાહી હાથ ધરી છે.
આરોપીનો ગુનાહિત ઈતિહાસ : ACP જે. આર. પટેલે જણાવ્યું હતું કે, અમને ફરિયાદ મળી હતી કે બ્રિજ નીચે ગાંજો લઈને લોકો એકબીજાને સપ્લાય કરે છે. આ અંગેની માહિતી મળતા ડ્રોન કેમેરાના માધ્યમથી તપાસ કરી બે લોકોની ધરપકડ કરવામાં આવી છે. આરોપી હિંમત સામે અગાઉ પણ મહિધરપુરા પોલીસ સ્ટેશન અને NDPS એક્ટ હેઠળ ફરિયાદ નોંધાઈ ચૂકી છે. તે ગુનાહિત ઇતિહાસ ધરાવે છે. આરોપી હિંમત ડ્રાઇવિંગ કરે છે, જ્યારે અન્ય આરોપી નિતીન મજૂરી કામ કરે છે.
