અમદાવાદ: પ્રસિધ્ધ હિન્દી કહેવત "બિના લહેરે ટકરાયે નાવ પાર નહિ હોતી, કોશિશ કરને વાલો કી કભી હાર નહી હોતી....." ગંગા મુંડેના કિસ્સામાં સાચી ઠરે છે. કાળુપુર રેલવે સ્ટેશનથી બિનવારસી મળી આવેલ ગંગા ઉર્ફે ગાયત્રી મુંડેએ અપાર સંઘર્ષ વેઠી, અનેક પડકારોનો સામનો કરીને ગૂજરાત વિદ્યાપીઠમાં એમએસડબ્લ્યુમાં એડમિશન મેળવ્યું છે. તેણી પાસે સામાન્ય ફી ભરવાના પણ પૈસા નહતા છતાં હિમ્મત હાર્યા વગર આજે ચોકકસ મુકામ સુધી પહોંચી છે. તો ચાલો જાણીએ ગંગાની સંઘર્ષભરી યાત્રાને વિગતવાર.
સમગ્ર ઘટનાક્રમઃ વર્ષ 2008ના એપ્રિલમાં અમદવાદ કાલુપુર રેલવે સ્ટેશન પર અંદાજીત 8 વર્ષની બાળકી રડતી હતી. પ્રવાસીઓએ આ રડતી બાળકીની માહિતિ આરપીએફ જવાનને આપી હતી. આરપીએફ જવાનો રડી રહેલી બાળકીને પોલીસ ચોકીએ લઈ ગયા હતા. બાળકીને પાણી અને નાસ્તો આપી શાંત કરવામાં આવી હતી. ત્યારબાદ પોલીસે પુછપરછ શરૂ કરી હતી. બાળકીએ પોતાનુ નામ ગાયત્રી મુનાય મુંડે હોવાનુ જણાવ્યું હતું. પોતે સુરતથી કાકા સાથે આવી હોવાનું જણાવ્યું હતું. રેલવે સ્ટેશન પર કાકાની શોધ કરવા છતા તેમની કોઈ ભાળ મળી ન હતી. ગાયત્રીને ઓઢવ જુવેનાઈલ હોમ ફોર ગર્લ્સમાં દાખલ કરાઈ હતી. તેના પરિવારની શોધખોળ માટે પોલીસે સુરતમાં ખૂબ પ્રયાસો કર્યા હતા. જો કે પરિવારની કોઈ ભાળ મળી ન હતી. ગાયત્રીને પાલડી વિકાસ ગૃહમાં મોકલવામાં આવી હતી. પાલડી વિકાસ ગૃહમાં ધો.1 માં પ્રવેશ આપવામાં આવ્યો હતો. આ સંસ્થામાં તેણે ધો.1 થી 12 સુધી અભ્યાસ કર્યો હતો. ધો.12 સુધી અભ્યાસ પૂર્ણ થયા બાદ ગાયત્રી(ગંગા)ને આગળ અભ્યાસ કરવો હતો. નવ ગુજરાત કોલજમાં તેણીએ બીએ પૂર્ણ કર્યુ હતું.કોરોના લોકડાઉન દરમિયાન ગંગાએ ગૃહમાતા કિશોરીબેનના મોબાઇલમાં અભ્યાસ કર્યો હતો. ગંગાએ મોબાઈલ પર અભ્યાસ કરીને કોલેજની પરીક્ષાઓ પાસ કરી હતી. ત્યારબાદ તેણીએ વધુ અભ્યાસ માટે મહાત્મા ગાંધીજીએ સ્થાપેલી ગૂજરાત વિદ્યાપીઠમાં એમએસડબલ્યુમાં પ્રવેશ મેળવ્યો છે.
તરછોડાયેલી નારીઓ માટે સંસ્થા બનાવવાનો ઉદ્દેશ્યઃ ગૂજરાત વિદ્યાપીઠમાં એમએસડબલ્યુનો અભ્યાસ કરતી ગંગાએ જણાવ્યુ કે, શરૂઆતમાં મને ભણવામાં ડર લાગતો હતો. સંસ્થામાં રહીને કેવી રીતે ભણી શકાય તે અંગે કોઈ માહિતિ પણ ન હતી. ક્યારેક ભણવાનુ છોડવાનો વિચાર પણ આવ્યો હતો, પરંતુ વિકાસ ગૃહ સંસ્થાના ટ્રસ્ટીઓએ ખૂબ મદદ કરી હતી. ટ્રસ્ટી રૂપાબેન મહેતાએ કોલેજ જવા માટે મંજૂરી આપી હતી. કોલેજ દરમિયાન શિક્ષણમાંથી સમાજકાર્ય કરવાની પ્રેરણા મળી હતી. તેથી મેં ગૂજરાત વિદ્યાપીઠમાં એમએસડબલ્યુમાં પ્રવેશ મેળવ્યો છે. રૂપાબેન મહેતા અને વૃતિકા વેગડાએ મને એમએસડબલ્યુમાં પ્રવેશ મેળવવામાં ખૂબ મદદ કરી છે. હું એમએમસડબલ્યુ કરીને સમાજમાં તરછોડાયેલ નારી માટે સંસ્થા શરૂ કરવા માંગું છું. જેથી મારી જેવી દીકરીઓને મદદ કરી શકું.
અમદાવાદ મહિલા અને બાળ વિકાસ વિભાગમાં જિલ્લા દહેજ પ્રતિબંધ અને સંરક્ષક અધિકારી તરીકે ફરજ બજાવતા વૃતિકાબેન વેગડાએ જણાવ્યું કે, સમાજમાં સંઘર્ષ કરીને આગળ આવનાર મહિલાનુ અમારો વિભાગ સન્માન કરે છે. ગંગા મુંડે રેલવે સ્ટેશન પરથી મળી આવી હતી. તેના વાલી-વારસોની કોઈ ભાળ ન મળતા વિકાસ ગૃહમાં રાખવામાં આવી હતી. વિકાસ ગૃહમાં તેણે ધો.1 થી 12 સુધીનો ઓભ્યાસ પૂર્ણ કર્યો છે. સારા ટકા સાથે કોલેજ પૂર્ણ કરીને હાલમા ગાંધી વિદ્યાપીઠમાં એમએસડબલ્યુમાં અભ્યાસ કરે છે. ભવિષ્યમાં ગંગાને સરકારી નોકરી મળે તેવો પ્રયાસ સમાજ કલ્યાણ વિભાગ કરશે. તેને મહિલા ઉત્કર્ષ માટે સંસ્થા ખોલવી હશે તો પણ અમે મદદ કરીશું.
