મોરબી: જીલ્લામાં 4 નગરપાલિકાઓ આવેલી છે. તેમાંથી 3 નગરપાલિકા મોરબી, હળવદ અને માળીયા પાલિકાના વીજ બિલ છેલ્લા ઘણા સમયથી ભરવામાં આવ્યા નથી. જેથી કરીને વીજ કંપનીએ 27 કરોડ રૂપિયા આ 3 પાલિકાઓ પાસેથી વસૂલ કરવાના બાકી છે.
મોરબી પાલિકાનું 12 કરોડનું બિલ: છેલ્લા વર્ષોમાં ગુજરાતમાં અણઘડ વહીવટને કારણે નગરપાલિકાઓની આર્થિક સ્થિતિ ડામાડોળ થઈ ગયું છે. નગરપાલિકાઓએ સ્વભંડોળની રકમ પણ વાપરી નાખી છે. જેથી કરીને પાલિકાઓની તિજોરી ખાલીખમ છે. આવી જ પરિસ્થિતિ મોરબી જીલ્લામાં આવેલી 4 પાલિકા પૈકીની 3 પાલિકાની છે. રાજ્યની નગરપાલિકાઓમાં મોરબી પાલિકાનો A ગ્રેડમાં સમાવેશ થાય છે.
2 વર્ષથી પાલિકાએ એક પણ બિલ ભર્યું નથી: જો કે, હવે પાલિકાની તિજોરીના તળિયા દેખાઇ આવ્યા હોય તેવી પરિસ્થિતિ દેખાઇ છે. જેથી વર્ષ 2022 માં ઝુલતો પુલ તૂટ્યો ત્યારથી પાલિકાએ એક પણ બિલ ભર્યું નથી. એટલે 2 વર્ષથી બિલ ભર્યું ન હોવાથી હાલમાં મોરબી પાલિકાનું 12 કરોડ જેટલું બિલ બાકી છે. આમ જ હળવદ પાલિકાએ પણ છેલ્લા ઘણા વર્ષોથી વીજ બિલની રકમ ભરી નથી. જેથી તેનું 15 કરોડથી વધુનું બિલ બાકી છે અને માળીયા પાલિકાનું પણ 67 લાખ જેટલું બિલ ભરવાનું બાકી છે.
3 પાલિકાનું 27 કરોડનું વીજ બિલ બાકી: આ પાલિકાઓમાં કોઈ આવક કે બચત ન હોવાથી હાલમાં આ ત્રણેય પાલિકાને વીજ બિલ ભરવાના પણ ફાંફા થઈ ગયા છે અને વીજ બિલ ભરવા માટે હાલમાં સરકાર પાસેથી ગ્રાન્ટ માંગવામાં આવી છે. તેવું પાલિકાના અધિકારી જણાવી રહ્યા છે. મોરબી જિલ્લાની 3 પાલિકાનું 27 કરોડથી વધુનું વીજ બિલ બાકી છે. તે રકમ પાલિકાઓ દ્વારા વીજ કંપનીની તિજોરીમાં ક્યારે ભરવામાં આવશે તે તો આગામી સમય જ બતાવશે.
વીજ કંપનીનું બિલ સતત વધી રહ્યું છે: અત્રે ઉલેખનીય છે કે, લોકોના ઘર સુધી પાણી પહોચાડવા માટે તેમજ સ્ટ્રીટ લાઇટો ચાલુ રાખવા માટે જે વીજ પુરવઠો વપરાય છે. તેનું બિલ પાલિકાએ ભરવાનું હોય છે અને આ રકમ ભરવા માટે મિલકત ધારકો પાસેથી પાલિકા દ્વારા ટેક્સ રૂપે રૂપિયા લઈ લેવામાં આવે છે. જો કે, પાલિકા એ રૂપિયા વીજ કંપનીમાં જમા કરાવતી નથી. જેથી કરીને વિજ કંપનીનું બિલ સતત વધી રહ્યું છે.
આ પણ વાંચો:
