નવી દિલ્હીઃ મુંબઈ અને બેંગ્લોર વચ્ચે રમાયેલી સેમી ફાઈનલ મેચમાં બેંગ્લોર જીતીને ફાઈનલમાં પહોંચી ગયું છે. ટાટાએ આ જીતની હીરો એલિસા પેરીને ખાસ ભેટ આપી હતી. મેચ બાદ પેરીને પાવર ઓફ પંચ એવોર્ડથી સન્માનિત કરવામાં આવી હતી. ટાટાએ આ એવોર્ડ આપ્યો હતો. પાવર ઓફ ધ પંચ એવોર્ડ પેરીને ફ્રેમમાં સુશોભિત તૂટેલા અરીસાના રૂપમાં આપવામાં આવ્યો હતો.
વાસ્તવમાં પેરીને ફ્રેમમાં જે અરીસો આપવામાં આવ્યો હતો તે પેરીએ પોતે જ તોડી નાખ્યો હતો. 4 માર્ચે યુપી વોરિયર્સ અને બેંગ્લોર વચ્ચે રમાયેલી મેચમાં પેરીએ શાનદાર સિક્સ ફટકારી હતી. જેમાં બોલ મેદાનની બહાર પાર્ક કરેલી ટાટા કારની વિન્ડશિલ્ડ સાથે અથડાયો હતો. જેના કારણે કાચ તૂટી ગયો હતો. તે સિક્સની સોશિયલ મીડિયા પર ખૂબ ચર્ચા થઈ હતી. જ્યારે આ કાચ તૂટ્યો ત્યારે પેરી અને ટીમે ખાસ પ્રતિક્રિયા આપી હતી.
ટાટાએ તૂટેલા કાચને એક ફ્રેમમાં સજાવીને પાવર ઓફ પંચ એવોર્ડથી પેરીનું સન્માન કર્યુ હતું. આ સાથે પેરીને સેમી ફાઈનલ મેચમાં તેના શાનદાર પ્રદર્શન માટે પ્લેયર ઓફ ધ મેચનો એવોર્ડ પણ આપવામાં આવ્યો હતો. જેમાં તેણી 60 રનની ઈનિંગ રમી હતી. તેના પ્રદર્શનના આધારે બેંગ્લોર ફાઈનલમાં જગ્યા બનાવવામાં સફળ રહ્યું હતું.
દિલ્હી અને બેંગ્લોર વચ્ચે ફાઈનલ મેચ 17 માર્ચે અરુણ જેટલી સ્ટેડિયમમાં રમાશે. જે ટીમ જીતશે તે પ્રથમ વખત મહિલા પ્રીમિયર લીગનું ટાઈટલ જીતશે. અગાઉ WPLની પ્રથમ સિઝનમાં મુંબઈએ આ ખિતાબ જીત્યો હતો.
