નવી દિલ્હીઃ દિલ્હી એક્સાઈઝ કૌભાંડ કેસમાં કોર્ટે સીએમ અરવિંદ કેજરીવાલને 14 દિવસની જ્યુડિશિયલ કસ્ટડીમાં મોકલી દીધા છે. અગાઉ, કોર્ટે કેજરીવાલની ન્યાયિક કસ્ટડીની સીબીઆઈની માંગ પર પોતાનો નિર્ણય અનામત રાખ્યો હતો. CBI કસ્ટડી પૂરી થયા બાદ કેજરીવાલને આજે દિલ્હીની રાઉઝ એવન્યુ કોર્ટમાં રજૂ કરવામાં આવ્યા હતા.
ઉપરાંત, 26 જૂન થી આજ દિન સુધી કોર્ટે કેજરીવાલને સીબીઆઈ કસ્ટડીમાં મોકલી દીધા હતા. હાજરી દરમિયાન સીબીઆઈના વકીલ ડીપી સિંહે કોર્ટને કહ્યું હતું કે ઘણા સાક્ષીઓના નિવેદન છે કે એક વ્યક્તિ કેજરીવાલને દિલ્હી એક્સાઈઝ પોલિસીને લઈને મળે છે. આ પોલિસી બને તે પહેલા પણ આવું થયું હતું. ડીપી સિંહે મગુંતા રેડ્ડીના નિવેદનોનો ઉલ્લેખ કર્યો.
ડીપી સિંહે કહ્યું કે સીબીઆઈ પાસે પુરાવા છે કે સાઉથ ગ્રુપે એક્સાઈઝ પોલિસી કેવી રીતે તૈયાર કરવી તે જણાવ્યું હતું. સાઉથ ગ્રુપ દિલ્હી આવ્યું. તે સમયે કોરોના ચરમસીમાએ હતો અને લોકો મરી રહ્યા હતા. તેણે રિપોર્ટ બનાવી અભિષેક બોઈનપલ્લીને આપ્યો. આ રિપોર્ટ વિજય નાયર દ્વારા મનીષ સિસોદિયાને આપવામાં આવ્યો હતો. ડીપી સિંહે કહ્યું કે કોરોના દરમિયાન ઉતાવળમાં નોટિફિકેશન બહાર પાડવામાં આવી હતી. તેની પાછળ અરવિંદ કેજરીવાલનો હાથ હતો.
ઉપરાંત, 21 માર્ચે અરવિંદ કેજરીવાલને દિલ્હી હાઈકોર્ટમાંથી ધરપકડથી રક્ષણ ન મળતા EDએ 21 માર્ચે મોડી સાંજે પૂછપરછ બાદ અરવિંદ કેજરીવાલની ધરપકડ કરી હતી. 10 મેના રોજ, સુપ્રીમ કોર્ટે અરવિંદ કેજરીવાલને લોકસભા ચૂંટણીમાં પ્રચાર કરવા માટે 1 જૂન સુધી વચગાળાના જામીન આપ્યા હતા અને તેમને 2 જૂને આત્મસમર્પણ કરવાનો આદેશ આપ્યો હતો. કેજરીવાલે 2 જૂને આત્મસમર્પણ કર્યું હતું. 21 જૂનના રોજ રાઉઝ એવન્યુ કોર્ટે કેજરીવાલને નિયમિત જામીન આપ્યા હતા, જેના પર દિલ્હી હાઈકોર્ટે સ્ટે લગાવી દીધો છે.
