નવી દિલ્હી: યુએસ પ્રમુખ ડોનાલ્ડ ટ્રમ્પે સત્તા સંભાળ્યા બાદ BRICS દેશો (જેમાં ભારતનો સમાવેશ થાય છે) પર ટેરિફ વધારવાની ધમકી આપી છે. ટ્રમ્પે પોતાની ચેતવણીને ફરી વખત જાહેર કરતા કહ્યું કે, જો સભ્ય દેશો તેમના ડી-ડોલરાઇઝેશન પ્રયાસો ચાલુ રાખશે તો તેઓને 100 ટકા ટેરિફનો સામનો કરવો પડશે.
ANI એ ટ્રમ્પને ટાંકીને કહ્યું કે, BRICS રાષ્ટ્રો તરીકે... જો તેઓ તેમના વિચાર મુજબ કામ કરવા વિશે વિચારે છે, તો તેમને 100 ટકા ટેરિફ ચૂકવવા પડશે, અને તેથી તેઓ તેને તરત જ છોડી દેશે. તેમણે વૈશ્વિક વેપારમાં ડોલરનો ઉપયોગ ઘટાડવાના પ્રયાસોનો ઉલ્લેખ કર્યો હતો. ટ્રમ્પે અમેરિકાના 47માં રાષ્ટ્રપતિ તરીકે શપથ લીધા બાદ ઓવલ ઓફિસમાં આયોજિત એક પ્રેસ કોન્ફરન્સ દરમિયાન આ નિવેદન આપ્યું હતું.
2009 માં રચાયેલ BRICS એ એકમાત્ર મુખ્ય આંતરરાષ્ટ્રીય જૂથ છે, જેનો ભાગ યુએસ નથી. તેના સભ્યોમાં ભારત, રશિયા, ચીન, બ્રાઝિલ, દક્ષિણ આફ્રિકા, ઈરાન, ઈજિપ્ત, ઈથોપિયા અને સંયુક્ત આરબ અમીરાતનો સમાવેશ થાય છે. છેલ્લાં કેટલાંક વર્ષોમાં, કેટલાક સભ્ય દેશો, ખાસ કરીને રશિયા અને ચીન, ડૉલરનો વિકલ્પ શોધી રહ્યાં છે અથવા પોતાની BRICS ચલણ બનાવવા માગે છે. ભારત હજુ સુધી આ પગલાનો ભાગ બન્યું નથી.
2023માં 15મી BRICS સમિટના પૂર્ણ સત્ર દરમિયાન, રશિયન પ્રમુખ વ્લાદિમીર પુતિને ડી-ડૉલરાઇઝેશનનું આહવાન કરતા કહ્યું હતું કે, સભ્ય દેશોએ રાષ્ટ્રીય કરન્સીમાં વ્યવહારનો વિસ્તાર કરવો જોઈએ અને બેંકો વચ્ચે સહકાર વધારવો જોઈએ.
