નવી દિલ્હી: વરિષ્ઠ રાજદ્વારી અનુરાગ શ્રીવાસ્તવને મોરેશિયસમાં ભારતના આગામી હાઈ કમિશનર તરીકે નિયુક્ત કરવામાં આવ્યા છે. મોરેશિયસ એક ટાપુ દેશ છે અને હિંદ મહાસાગર ક્ષેત્રમાં વ્યૂહાત્મક દ્રષ્ટિકોણથી મહત્વપૂર્ણ છે.
શ્રીવાસ્તવ, 1999 બેચના ભારતીય વિદેશ સેવા (IFS) રાજદ્વારી, હાલમાં વિદેશ મંત્રાલય (MEA) ના મુખ્યાલયમાં નેપાળ-ભૂતાન વિભાગના સંયુક્ત સચિવ તરીકે સેવા આપી રહ્યા છે. વર્તમાનની કે. નંદિની સિંગલાની જગ્યા લેશે. વિદેશ મંત્રાલયે શનિવારે એક સંક્ષિપ્ત નિવેદનમાં જણાવ્યું હતું કે શ્રીવાસ્તવ ટૂંક સમયમાં કાર્યભાર સંભાળે તેવી અપેક્ષા છે.
માર્ચ 2021માં નેપાળ-ભૂતાન ડિવિઝનમાં સંયુક્ત સચિવ તરીકે નિયુક્ત થતાં પહેલાં, તેમણે લગભગ એક વર્ષ સુધી વિદેશ મંત્રાલયમાં પ્રવક્તા તરીકે સેવા આપી હતી. શ્રીવાસ્તવે સપ્ટેમ્બર 2016 થી ફેબ્રુઆરી 2020 સુધી ઇથોપિયા અને આફ્રિકન યુનિયનમાં ભારતના રાજદૂત તરીકે પણ સેવા આપી હતી.
રાજદ્વારી તરીકેની તેમની લગભગ 25 વર્ષની કારકિર્દીમાં તેમણે વિદેશમાં અનેક ભારતીય મિશનમાં પણ કામ કર્યું હતું. તેમાં મુખ્યત્વે કોલંબોમાં નવી દિલ્હીના હાઈ કમિશનમાં રાજકીય શાખાના વડા તરીકે કામ કરવું અને જિનીવામાં સંયુક્ત રાષ્ટ્રમાં ભારતના કાયમી મિશનમાં કામ કરવાનો સમાવેશ થાય છે.
શ્રીલંકામાં ભારતના વિકાસ પરિયોજનાઓની રચના અને અમલીકરણમાં તેમની મહત્વપૂર્ણ ભૂમિકા હતી. તેમણે નવી દિલ્હીમાં વિદેશ કાર્યાલયમાં વિવિધ પદો પર પણ સેવા આપી છે. તેમાં પાકિસ્તાન-અફઘાનિસ્તાન-ઈરાન વિભાગનો પણ સમાવેશ થાય છે. શ્રીવાસ્તવે એન્જિનિયરિંગ અને બિઝનેસ મેનેજમેન્ટમાં ડિગ્રી મેળવી હતી. ફોરેન સર્વિસમાં જોડાતા પહેલા તેમણે કોર્પોરેટ સેક્ટરમાં થોડો સમય કામ કર્યું હતું. તેમણે ઓક્સફર્ડ યુનિવર્સિટીમાંથી ડિપ્લોમેટિક સ્ટડીઝમાં પોસ્ટ ગ્રેજ્યુએટ ડિપ્લોમા પણ મેળવ્યો છે.
