નવી દિલ્હી : દિલ્હીમાંથી ઝડપાયેલા રુ. 5000 કરોડના ડ્રગ્સ કેસમાં દિલ્હી પોલીસની સ્પેશિયલ સેલે પંજાબમાંથી વધુ એક આરોપીની ધરપકડ કરી છે. આરોપીનું નામ જિતેન્દ્ર પ્રીત ગિલ છે અને તે બ્રિટનનો રહેવાસી છે, પરંતુ ભારતીય નાગરિક છે. દિલ્હી પોલીસ આજે સવારે તેને દિલ્હી લાવી છે. હવે આરોપીને કોર્ટમાં રજૂ કરી રિમાન્ડ પર લેવામાં આવશે અને પછી પૂછપરછ કરવામાં આવશે.
આંતરરાષ્ટ્રીય ગેંગનો પર્દાફાશ : ગત બુધવારના રોજ દિલ્હી પોલીસે આંતરરાષ્ટ્રીય ગેંગનો પર્દાફાશ કરીને ચાર સ્મગલર તુષાર ગોયલ, હિમાંશુ કુમાર (27), ઔરંગઝેબ સિદ્દીકી (23) અને ભરત કુમાર જૈનની (48) ધરપકડ કરી હતી. મળતી માહિતી મુજબ, 40 વર્ષીય તુષાર ગોયલ મુખ્ય સૂત્રધાર હોવાનું કહેવાય છે.
રુ. 5000 કરોડના ડ્રગ્સ કેસ : દિલ્હી પોલીસે મહિપાલપુરમાં આરોપીના વેરહાઉસમાંથી 562 કિલો કોકેઈન અને થાઈલેન્ડનો 40 કિલો હાઈડ્રોપોનિક ગાંજો જપ્ત કર્યો છે. ડ્રગ્સનું આ કન્સાઈનમેન્ટ વિદેશથી મહારાષ્ટ્રના એક બંદરે આવ્યું હતું. આંતરરાષ્ટ્રીય બજારમાં જપ્ત કરાયેલા નાર્કોટિક્સના આ કન્સાઈનમેન્ટની કિંમત 2000 થી 5000 કરોડ રૂપિયા હોવાનું કહેવાય છે.
દિલ્હીના પોશ વિસ્તાર ટાર્ગેટ : અધિકારીએ કહ્યું કે, આ લોકોની યોજના દિલ્હી અને અન્ય શહેરોમાં સંગીત સમારોહ અને પોશ વિસ્તારમાં મોટી માત્રામાં ડ્રગ્સનું વિતરણ કરવાની હતી. પોલીસે જૂથના અન્ય સભ્યોને પકડવા માટે ઘણી ટીમો બનાવી છે. અધિકારીઓએ સંકેત આપ્યો છે કે ભારત અને વિદેશના લગભગ એક ડઝન લોકો મધ્ય પૂર્વના દેશોમાંથી ભારતમાં પ્રતિબંધિત દવાઓની દાણચોરીમાં કથિત રીતે સામેલ છે.
રાજકીય પક્ષો સાથે ગોયલના સંબંધો : આરોપી તુષાર ગોયલની સોશિયલ મીડિયામાં હાજરીથી કોંગ્રેસ પાર્ટીના નેતાઓ સાથેની ઘણી તસવીરો સામે આવી છે. તેની કથિત ફેસબુક પ્રોફાઇલમાં વાઘની તસવીર છે, એવું માનવામાં આવે છે કે, તે ભારતીય યુથ કોંગ્રેસના દિલ્હી રાજ્ય RTI સેલ DYPC ના પ્રમુખ છે. જોકે, ભારતીય યુથ કોંગ્રેસે સ્પષ્ટતા કરી હતી કે, ગોયલને 17 ઓક્ટોબર, 2022 ના રોજ પક્ષ વિરોધી પ્રવૃત્તિ કરવા બદલ હાંકી કાઢવામાં આવ્યા હતા.
