CBSE દ્વારા ધો. 10-12 પરીક્ષાની તારીખો જાહેર, અહીં જુઓ સંપૂર્ણ શેડ્યૂલ

CBSE દ્વારા સત્તાવાર જાહેર કરી ધો. 10-12 પરીક્ષાની તારીખો જાહેર કરવામાં આવી છે. જાણો ક્યારથી શરુ થશે પરીક્ષા અને સંપૂર્ણ શેડ્યૂલ

નવી દિલ્હી : સેન્ટ્રલ બોર્ડ ઓફ સેકન્ડરી એજ્યુકેશને (CBSE) બુધવારે જાહેરાત કરી કે ધોરણ 10 અને 12ની બોર્ડની પરીક્ષા 15 ફેબ્રુઆરીથી શરૂ થશે. મોડી રાત્રે જારી કરાયેલ એક સૂચનામાં બોર્ડે જાહેરાત કરી કે ધોરણ 10 ની પરીક્ષા 18 માર્ચે સમાપ્ત થશે, જ્યારે 12 ની પરીક્ષા 4 એપ્રિલ, 2025 ના રોજ સમાપ્ત થશે. CBSE ની સત્તાવાર વેબસાઇટ cbse.gov.in પરથી ડેટશીટ એક્સેસ અને ડાઉનલોડ કરી શકાય છે.

CBSE તારીખ પત્રક 2025 : CBSE પરીક્ષા નિયંત્રક સંયમ ભારદ્વાજે જણાવ્યું હતું કે, "બે વિષયો વચ્ચે પર્યાપ્ત અંતર આપવામાં આવ્યું છે. ઓછામાં ઓછા 40,000 વિષયોના સંયોજનોને ધ્યાનમાં રાખીને ડેટાશીટ તૈયાર કરવામાં આવી છે, જેથી વિદ્યાર્થી દ્વારા પસંદ કરાયેલા બે વિષયો એક સરખી તારીખ પર ન આવે." પ્રથમ વખત પરીક્ષા શરૂ થયાના લગભગ 86 દિવસ પહેલા ડેટશીટ જાહેર કરવામાં આવી છે.

CBSE તારીખ પત્રક 2025 (ETV Bharat Gujarat)

ડેટાશીટ તૈયાર કરવામાં કયા મુદ્દાઓ ધ્યાનમાં રાખવામાં આવ્યા...

1. સામાન્ય રીતે બંને વર્ગોમાં વિદ્યાર્થી દ્વારા લેવામાં આવતા બે વિષયો વચ્ચે પૂરતું અંતર આપવામાં આવે છે.
2. ધોરણ 12 ના વિદ્યાર્થીઓ માટે પ્રવેશ પરીક્ષાઓની તારીખને ધ્યાનમાં રાખવામાં આવી છે. પ્રવેશ પરીક્ષા પહેલા પરીક્ષાઓ સારી રીતે પૂર્ણ કરવાના પ્રયાસો કરવામાં આવ્યા છે. આનાથી વિદ્યાર્થીઓને બોર્ડ અને પ્રવેશ પરીક્ષા માટે વધુ સારા સમય વ્યવસ્થાપનમાં મદદ મળશે.
3. મૂલ્યાંકન દરમિયાન તમામ વિષયોના શિક્ષકો એકસાથે અને લાંબા સમય સુધી શાળાથી દૂર રહેશે નહીં.
4. વિદ્યાર્થી દ્વારા પસંદ કરવામાં આવતા બે વિષયોની પરીક્ષા એક જ તારીખે લેવામાં ન આવે તે સુનિશ્ચિત કરવા માટે 40,000 થી વધુ વિષયના સંયોજનોને ધ્યાનમાં રાખીને ડેટશીટ તૈયાર કરવામાં આવી છે.
5. પરીક્ષાઓ સવારે 10.30 વાગ્યે (ભારતીય સમય મુજબ) શરૂ થશે.

ડેટશીટના વહેલા પ્રકાશનથી આ લાભ થશે...

1. વિદ્યાર્થીઓ પરીક્ષાની તૈયારી અગાઉથી શરૂ કરી શકશે, જે તેમને પરીક્ષાની ચિંતા દૂર કરવામાં અને પ્રદર્શન સુધારવામાં મદદ કરશે.
2. પરીક્ષામાં હાજર રહેલા વિદ્યાર્થીઓના પરિવારો અને શિક્ષકો પરીક્ષાની તારીખ અને મૂલ્યાંકન શેડ્યૂલને ધ્યાનમાં રાખીને ઉનાળાના વેકેશન દરમિયાન તેમની મુસાફરીનું આયોજન કરી શકશે.
3. શિક્ષકો તેમની શાળાઓથી લાંબા સમય સુધી દૂર રહેશે નહીં, તેથી બોર્ડ સિવાયના વર્ગોમાં અભ્યાસ ખોરવાશે નહીં.
4. બે વિષયોની પરીક્ષા વચ્ચેનો સમયગાળો પૂરતો છે. વિદ્યાર્થીઓને આગામી વિષયની પરીક્ષાની તૈયારી કરવામાં પણ મદદ કરશે.
5. શાળાઓ અને બોર્ડ વર્ગો માટે સારી યોજનાઓ બનાવી શકશે.
6. પરીક્ષા કેન્દ્રો તરીકે નક્કી કરાયેલ શાળાઓ પાસે તેમની શાળાની પ્રવૃત્તિઓનું આયોજન કરવા માટે પૂરતો સમય હશે.