નવી દિલ્હી: CBSEની ટીમે સપ્ટેમ્બરમાં રાજસ્થાન અને દિલ્હીની ઘણી શાળાઓમાં ઓચિંતી તપાસ હાથ ધરી હતી. આ સમયગાળા દરમિયાન બોર્ડ સાથે જોડાયેલી 27 શાળાઓમાં અનેક પ્રકારની ખામીઓ જોવા મળી હતી. જેમાં દિલ્હીની 22 અને રાજસ્થાનની 5 શાળાઓનો સમાવેશ થાય છે. રાજસ્થાનની શાળાઓમાં બે શાળાઓ સીકર જિલ્લામાં અને ત્રણ શાળા કોટા જિલ્લામાં આવેલી છે. આ નિરીક્ષણનો મુખ્ય ઉદ્દેશ એ સુનિશ્ચિત કરવાનો હતો કે શાળાઓ બોર્ડના જોડાણ અને પરીક્ષાના પેટા-નિયમો અનુસાર વિદ્યાર્થીઓની નિયમિત હાજરીના ધોરણોનું પાલન કરે છે કે કેમ.
નિરીક્ષણ દરમિયાન, CBSE અધિકારીઓને આ શાળાઓમાં મોટી સંખ્યામાં વિદ્યાર્થીઓ ગેરહાજર જણાયા હતા. એટલું જ નહીં, ધોરણ 9 અને 12માં મોટી સંખ્યામાં વિદ્યાર્થીઓ ગેરહાજર રહેવાના કારણે 21 શાળાઓની માન્યતા રદ કરવામાં આવી હતી. અગાઉ શાળાઓને કારણદર્શક નોટિસ પાઠવવામાં આવી હતી અને જવાબ આપવા માટે 30 દિવસનો સમય આપવામાં આવ્યો હતો.
CBSE દ્વારા આપવામાં આવેલી માહિતી અનુસાર, ''આંતરરાષ્ટ્રીય હાજરી સાથે અગ્રણી રાષ્ટ્રીય શિક્ષણ બોર્ડ તરીકે, અમે લાંબા સમયથી શૈક્ષણિક સુધારાને અનુસરવા, ગુણવત્તાયુક્ત શિક્ષણ પ્રદાન કરવા અને વિદ્યાર્થીઓના સર્વાંગી વિકાસને પ્રોત્સાહન આપવા માટે પ્રતિબદ્ધ છીએ. તેથી, બાળકોની હાજરી વિના માત્ર કાગળ પર શાળાઓ ચલાવવા સામે અમે નિર્ણાયક પગલાં લઈ રહ્યા છીએ. જેથી ભવિષ્યમાં આવી શાળાઓ ચલાવનારાઓને મજબૂત સંદેશો આપી શકાય. શાળાઓ કાયદેસર અને નૈતિક શૈક્ષણિક પ્રથાઓનું પાલન કરે તેની ખાતરી કરવા બોર્ડ સતત પ્રયત્નો કરશે. તેથી, છ શાળાઓને વરિષ્ઠ માધ્યમિકથી માધ્યમિક શાળાઓમાં ડાઉનગ્રેડ કરવાની કાર્યવાહી પણ કરવામાં આવી છે."
તમને જણાવી દઈએ કે, CBSE દ્વારા આપવામાં આવેલી માહિતી અનુસાર, આ તપાસ સપ્ટેમ્બર મહિનામાં કરવામાં આવી હતી. શાળાઓ દ્વારા સબમિટ કરાયેલા જવાબોની બોર્ડ દ્વારા વિગતવાર તપાસ કરવામાં આવી હતી. પરંતુ શાળાઓના જવાબથી બોર્ડ સંતુષ્ટ ન થતા માન્યતા રદ કરવાની કાર્યવાહી કરવામાં આવી હતી.
