টীয়কত ক'ভিড প্ৰট'কল ভংগকাৰীৰ বিৰুদ্ধে প্ৰশাসনৰ তৎপৰতা

যোৰহাট জিলাৰ টীয়কৰ চিন্তামণি গড় অঞ্চলত ক'ভিড আক্ৰান্তৰ সংখ্যা বৃদ্ধি পোৱাৰ পৰিপ্ৰেক্ষিতত শনিবাৰে বিয়লি জিলা প্ৰশাসনৰ লগতে আৰক্ষী, আবকাৰী আৰু চিআৰপিএফৰ এটা বৃহৎ দলে অঞ্চলটো পৰিভ্ৰমণ কৰে ৷ পৰিদৰ্শনকাৰী দলটোত জিলাখনৰ তিনিগৰাকীকৈ অতিৰিক্ত উপায়ুক্ত, আবকাৰী বিভাগৰ উচ্চ পদস্থ বিষয়াসহ স্থানীয় চক্ৰ বিষয়া আদি উপস্থিত থাকে ৷ দলটোৱে বিভিন্ন অঞ্চল পৰিদৰ্শন কৰি ৰাইজৰ সৈতে মত বিনিময় কৰে ৷ লগতে সকলোকে ক'ভিড বিধি অৱলম্বন কৰি ঘৰতে সুৰক্ষিত হৈ থাকিবলৈ আহ্বান জনায় ৷ উল্লেখ্য যে, বৃহত্তৰ অঞ্চলটোত থকা কেইবাটাও অবৈধ চুলাই মদৰ ঘাটিৰ বাবে ক'ভিড সংক্ৰমণ বৃদ্ধি পোৱা বুলি বিভিন্ন মহলে অভিযোগ উত্থাপিত কৰি আহিছিল ৷ যাৰ পৰিপেক্ষিতত জিলা প্ৰশাসনৰ দলটোৱে বৃহত্তৰ অঞ্চলটো পৰিদৰ্শন কৰে ৷ ক'ভিডৰ সংক্ৰমণ ৰোধ কৰিবলৈ ৰাইজক সহযোগিতা আগবঢ়াবলৈ আহ্বান জনাই অতিৰিক্ত উপাযুক্ত দামোদৰ বৰ্মনে ৷