বিশ্বনাথত প্ৰচণ্ড ধুমুহাৰ ফলত বিস্তৰ ক্ষতিসাধন

ৰাজ্যৰ বিভিন্ন অঞ্চলৰ লগতে সোমবাৰে বিশ্বনাথৰ বিভিন্ন প্ৰান্তত বৰষুণৰ সৈতে অহা এজাক ধুমুহাই বিস্তৰ ক্ষতিসাধন কৰে ৷ বিয়লি ৫ মান বজাৰ পৰা সন্ধিয়া ৬ বজালৈ হোৱা বৰষুণৰ সৈতে অহা প্ৰচণ্ড ধুমুহাৰ ফলত বিশ্বনাথৰ বিভিন্ন অঞ্চলত ব্যাপক ক্ষতি হয় ৷ বিশেষকৈ বিহালী সমষ্টিৰ মোনাবাৰী, বৰগাং, বেদেতী, ৰাংচালী গাঁৱত গছ উভালি পৰি কেইবাটাও বিদ্যুৎ পৰিবাহী খুঁটা ভাগি যোৱাৰ লগতে তাঁৰ ছিঙি যায় ৷ ফলত সন্ধিয়াৰ পৰা এইমুহুৰ্ত পর্যন্ত বৃহত্তৰ অঞ্চলটোৰ বিদ্যুৎ সংযোগ ব্যাহত হৈ আছে ৷ ইফালে বতাহ-ধুমুহাই বহু লোকৰ ঘৰ-দুৱাৰৰ টিনপাত উৰুৱাই নিয়াৰ লগতে বহু লোকৰ তামোল-নাৰিকল গছ উভালি পৰা বুলি জানিব পৰা গৈছে ৷