Massive fire at Kalgachia: কলগাছিয়াৰ কাউৰজাহিত ভয়ংকৰ অগ্নিকাণ্ড

বৰপেটা জিলাৰ কলগাছিয়া ৰাজহ চক্ৰৰ অন্তর্গত কাউৰজাহিৰ নিশা প্ৰায় সাত বজাত সংঘটিত হয় বিধ্বংসী অগ্নিকাণ্ডৰ ঘটনা (Massive fire at Kalgachia)। বৈদ্যুতিক শ্বৰ্ট-চাৰ্কিটৰ ফলত সংঘটিত হয় এই অগ্নিকাণ্ড । অগ্নিকাণ্ডৰ ফলত আশ্ৰফ আলি নামৰ লোকজনৰ পৰিয়ালৰ তিনিটাকৈ ঘৰ সম্পূৰ্ণৰূপে ভষ্মীভূত হোৱাৰ লগতে প্ৰায় পাঁচ লক্ষাধিক টকাৰ সা-সম্পত্তিৰ আৰু বহু নথি-পত্ৰ জুইত জাহ যায় ৷ অতি পিছপৰা অঞ্চলটোলৈ যোৱা পথছোৱা জৰাজীৰ্ণ হোৱাৰ বাবে সময়তমতে অগ্নিনিৰ্বাপক বাহিনীৰ গাড়ী উপস্থিত হ’ব নোৱাৰাৰ ফলতে ঘৰখন ভষ্মীভূত হ’ল বুলি অভিযোগ উত্থাপিত হৈছে । স্থানীয় ৰাইজে অতি সোনকালে পথছোৱা মেৰামতিৰ লগতে জুইত সম্পূৰ্ণৰূপে ভষ্মীভূত হৈ সৰ্বহাৰা হোৱা পৰিয়ালটোক আৰ্থিক সহায়ৰ বাবে জিলা প্ৰশাসন, জনপ্ৰতিনিধি আৰু চৰকাৰৰ ওচৰত আহ্বান জনাইছে ।