Road Accident : কলিয়াবৰৰ কুঁৱৰীটোল-শিলঘাট গড়কাপ্তানী পথত শোকাৱহ পথ দুৰ্ঘটনা

কলিয়াবৰ, 9 নৱেম্বৰ : কলিয়াবৰৰ কুঁৱৰীটোল শিলঘাট গড়কাপ্তানী পথত বৃহস্পতিবাৰে সংঘটিত হয় এক শোকাৱহ পথ দুৰ্ঘটনা ৷ অচিনাক্ত বাহনৰ খুন্দাত নিহত হয় এজন মটৰচাইকেল আৰোহী ৷ লগতে গুৰুতৰভাৱে আহত হয় এজন ৷ নিহতজনক মটৰচাইকেলৰ চালক বিতু ৰয় বুলি চিনাক্ত কৰাৰ লগতে গুৰুতৰভাৱে আহত আৰোহী বিতু ৰয়ৰ পত্নী পুষ্পাঞ্জলি দাস বুলি জানিব পৰা গৈছে ৷

জানিব পৰা মতে আমবাগানৰ পৰা কুঁৱৰীটোল অভিমুখে আহি থকাৰ সময়তে সন্ধিয়া প্ৰায় আঠমান বজাত কুঁৱৰীটোল চাৰিআলিৰ সমীপতে এ এছ 02 ভি 0224 নম্বৰৰ মটৰ চাইকেলখনক এখন অচিনাক্ত বাহনে মহতিয়াই নিয়াৰ ফলত চালক বিতু ৰয় থিতাতে নিহত হয় ৷ লগতে বাইক আৰোহী পত্নী পুষ্পাঞ্জলি দাস গুৰুতৰভাৱে আহত হয় ৷

আহত পুষ্পাঞ্জলিক জখলাবন্ধাৰ কলিয়াবৰ মহকুমা অসামৰিক চিকিৎসালয়ত ভৰ্তি কৰোৱা হয় যদিও উন্নত চিকিৎসাৰ বাবে তেজপুৰ চিকিৎসা মহাবিদ্যালয় চিকিৎসালয়লৈ প্ৰেৰণ কৰা হৈছে ৷ 

লগতে পঢ়ক : Theft in Golaghat: ঘৰত কোনো নথকাৰ সুযোগ লৈ চোৰৰ লুটপাত