Diwali 2022: দীপান্বিতাৰ বাবে ব্যস্ততা বাঢ়িছে মৃৎশিল্পীৰ মাজত

আহি আছে পোহৰৰ উৎসৱ দীপান্বিতা (Diwali 2022)। দীপাৱলীৰ দিনা সকলোৰে ঘৰৰ চৌপাশ আলোকেৰে উজলাই তুলিবলৈ দিন ৰাতি একাকাৰ কৰিছে মাটিৰ খনিকৰসকলে (Pottery artists busy making Earthen Lamp) । আপোনাৰ, মোৰ ঘৰ আৰু পদুলিমুখ আলোকেৰে জিলিকাই তুলিবলৈ মৃৎ শিল্পীসকলে সাঁজি উলিয়াইছে সৰু-বৰ বিভিন্ন আকৃতিৰ মাটিৰ চাকি । ব্যস্ততা বাঢ়িছে টিংখাঙৰ ৰাজেশ পণ্ডিত নামৰ মৃৎশিল্পীজনৰ পৰিয়ালতো ৷ দিনে-নিশাই কুমাৰশালত মাটিৰ চাকি প্ৰস্তুত কৰাত ব্যস্ত মৃৎশিল্পীৰ পৰিয়ালটো । টিংখাঙৰ মাজগাঁৱৰ এই মৃৎ উদ্যোগটোৱে বিগত প্ৰায় ৩০ বছৰে বিভিন্ন ঠাইত অন্যান্য সামগ্ৰীৰ লগতে মাটি-চাকিৰ যোগান ধৰি আহিছে । বিশেষকৈ দীপান্বিতাৰ পূৰ্বে ব্যাপক হাৰত বৃদ্ধি পাইছে ইয়াৰ চাহিদা । বংশগতভাৱে ৰাজেশ পণ্ডিত নামৰ এইজন যুৱকে চলাই আহিছে এই বৃত্তি । ইয়াত প্ৰস্তুত কৰা মাটি-চাকিসমূহ উজনি অসমৰ বিভিন্ন ঠাইত বিক্ৰী কৰা হয় । তেওঁৰ এই ক্ষুদ্ৰ উদ্যোগটোৰ জৰিয়তে নিজে স্বাৱলম্বী হোৱাৰ লগতে বৰ্তমানে অন্য দুজন লোককো সংস্থাপন দিবলৈ সক্ষম হৈছে । এইবাৰ বতৰে কিছু বিধি-পথালি দিলেও দুটা বছৰৰ ক’ভিড সৃষ্ট পৰিৱেশৰ পাচত কিছু পৰিমাণে হ’লেও এইসকল মৃৎশিল্পীৰ মুখত হাঁহি বিৰিঙি উঠা দেখিবলৈ পোৱা গৈছে ।