জয়ন্ত দাসৰ মৃত্যুত দুখ প্ৰকাশ অভিনেতা বিষ্ণু খাৰঘৰীয়াৰ

ডিব্ৰুগড়, 17 ডিচেম্বৰ: অসমীয়া চলচ্চিত্ৰ তথা ধাৰাবাহিকৰ এগৰাকী অন্যতম সুদক্ষ অভিনেতা জয়ন্ত দাস আৰু নাই ৷ সকলোকে কন্দুৱাই অজান পৃথিৱীলৈ গুচি গ’ল ছবিজগতত সকলোৰে মাজত পৰিচিত ৰাজুদা । তেওঁৰ মৃত্যুৰ পিচতে গভীৰ শোকৰ ছাঁ পৰিছে অসমীয়া ছবিজগতত ৷

ইফালে ৰাজুদাৰ মৃত্যুত শোক প্ৰকাশ কৰিছে আন্তঃৰাষ্ট্ৰীয় খ্যাতিসম্পন্ন অভিনেতা বিষ্ণু খাৰঘৰীয়াই । প্ৰায় চাৰিটা দশকজুৰি নিজৰ অনবদ্য অভিনয়েৰে দৰ্শকৰ হৃদয় জয় কৰা জয়ন্ত দাসৰ স্মৃতি সদায় আমাৰ মাজত সজীৱ হৈ থাকিব বুলি কয় বিষ্ণু খাৰঘৰীয়াই । জনপ্ৰিয় কেইবাখনো বোলছবিত একে লগে অভিনয় কৰা জয়ন্ত দাসৰ সৈতে পাৰ কৰা স্মৃতিক শ্ৰদ্ধাৰে সোঁৱৰিলে প্ৰবীণ অভিনেতাগৰাকীয়ে ।  

বিষ্ণু খাৰঘৰীয়াই লগতে কয়, ‘‘জয়ন্ত দাস এজন সাহসী আৰু স্পষ্টবাদী অভিনেতা অছিল । কিন্তু এতিয়া এজন স্পষ্টবাদী মানুহ নোহোৱা হৈ গ’ল ৷ তেখেতৰ বিদেহ আত্মাই চিৰশান্তি লাভ কৰক ৷ শোকস্তব্ধ পৰিয়ালবৰ্গলৈ গভীৰ সমবেদনা জ্ঞাপন কৰিছো ৷ ’’  

লগতে পঢ়ক: জীৱনৰ ৰংগমঞ্চৰ পৰা বিদায় মাগিলে জয়ন্ত দাসে