বৰ্তমান সময়ত সমগ্র বিশ্বতে বৃক্ক সম্পৰ্কীয় ৰোগত আক্ৰান্ত লোকৰ সংখ্যা বৃদ্ধি পোৱা দেখা গৈছে ৷ উচ্চ ৰক্তচাপ আৰু ডায়েবেটিচৰ বাবে এইৰোগত অধিক লোক আক্রান্ত হোৱা এটা মূল কাৰণ ৷ মগজু, হৃদপিণ্ড আদিৰ দৰে কিডনীও মানৱ দেহৰ অতি গুৰুত্বপূৰ্ণ অংগ ৷ প্ৰতিজন ব্যক্তিৰে দুটাকৈ কিডনী বা বৃক্ক থাকে ৷ কিডনীয়ে আমাৰ শৰীৰৰ তেজ শোধন কৰি তেজত থকা লৱনৰ গাঢ়তা নিয়ন্ত্ৰণ কৰি ৰাখাৰ লগতেই শৰীৰৰ পৰা বৰ্জিত পদাৰ্থ আৰু অতিৰিক্ত লৱণ পেচাবৰ লগত বাহিৰ কৰে ৷ কিডনী বিকল হৈ মানুহ মৃত্যুও হয় ৷
বৃক্ক সম্পৰ্কীয় ৰোগত আক্ৰান্তসকলে কেনেধৰণৰ খাদ্য গ্ৰহণ কৰিব লাগে ?
১) এনে ৰোগীসকলে কম নিমখ যুক্ত খাদ্য গ্ৰহণ কৰিব লাগে ৷ প্ৰতিগৰাকী লোকে সাধাৰণতে ৫ গ্ৰামতকৈ অধিক নিমখ খাব নালাগে ৷ বৃক্ক সম্পৰ্কীয় ৰোগত আক্ৰান্তসকলে গোটেই দিনটোৰ ভিতৰত ২ গ্ৰামৰ ভিতৰত নিমখ খাব লাগে ৷
২) কেতিয়াবা কিছু ৰোগীৰ হাত ভৰি ফুলাও দেখা যায় ৷ তেতিয়া তেনে ৰোগীসকলে নিমখৰ লগতেই পানীৰ পৰিমাণটোও কম কৰি খাব লাগে ৷
৩) কম প্ৰ’টিনযুক্ত খাদ্য গ্ৰহণ কৰিব লাগে ৷
৪) মাছ, মাংস, কণী, লুভীয়া, চয়াবিন, ৰাজমাহ আদিৰ দৰে উচ্চ প্ৰ’টিন যুক্ত খাদ্য পৰিহাৰ কৰিব লাগে ৷
৫) বেছি চৰ্বি বা তেল যুক্ত খাদ্য খাব নালাগে ৷
৬) এনে ৰোগীসকলে কম মিঠাযুক্ত খাদ্য খাব পাৰিলে ভাল ৷
৭) গাখীৰৰ লগতেই গাখীৰৰ পৰা উৎপাদিত খাদ্যত কেলচিয়াম বেছিকৈ থকা ৷ সেইবাবে গাখীৰৰ লগতেই গাখীৰৰ পৰা উৎপাদিত খাদ্য কমকৈ খাব লাগে ৷
