সমাগত পোহৰৰ উৎসৱ দীপাৱলী ৷ এই উৎসৱ ৰঙীন সাজ-পোছাক, সজ্জা আৰু সুস্বাদু খাদ্যৰ বাবে জনাজাত ৷ দীপাৱলীত লক্ষ্মী-গণেশক পূজা কৰা হয় ৷ সুস্বাদু খাদ্যৰ লগতে এই উৎসৱত আতচবাজীও মানুহে উপভোগ কৰে ৷ প্ৰাচীন কালৰে পৰা দীপাৱলীত ফটকা ফুটুওৱাৰ পৰম্পৰা চলি আহিছে ৷ কিন্তু ইয়াৰ লগতে পৰিৱেশৰ ক্ষতি হৈ আহিছে ৷ এনে সময়ত বিশেষকৈ গৰ্ভৱতী মহিলাই ইয়াৰ প্ৰতি সাৱধান হোৱা উচিত ৷
স্বাস্থ্য বিশেষজ্ঞৰ মতে, ফটকাৰ পৰা নিৰ্গত ধোঁৱা মাতৃ আৰু শিশু উভয়ৰে বাবে বিপদজনক হ’ব পাৰে ৷ ফটকাৰ পৰা নিৰ্গত ধোঁৱাত ছালফাৰ ডাই অক্সাইড, নাইট্ৰজেন ডাই অক্সাইড আৰু কণাকে ধৰি বহুতো বিষাক্ত মৌল থাকে ৷ গৰ্ভাৱস্থাত যদি মহিলাসকল এই প্ৰদূষণৰ সংস্পৰ্শলৈ আহে তেন্তে এই বিপজ্জনক গেছবোৰ শ্বাসনলীত প্ৰৱেশ কৰিব পাৰে, যাৰ ফলত স্বাস্থ্যৰ ক্ষতি হ’ব পাৰে ৷
ছালৰ এলাৰ্জী
জোৰেৰে ফটকা ফুটুওৱাৰ ফলত অধিক প্ৰদূষণৰ সৃষ্টি হয় আৰু ইয়াৰ সংস্পৰ্শলৈ অহাৰ বাবে ছালৰ এলাৰ্জীৰ আশংকাও থাকে ৷ ফটকাত থকা ৰাসায়নিক পদাৰ্থ ছালৰ মাজেৰে শৰীৰলৈ যাব পাৰে ৷ এনে পৰিস্থিতিত যিকোনো গৰ্ভৱতী মহিলাই ফটকাৰ পৰা দূৰত্ব বজাই ৰখাটো উচিত ৷
হাঁপানী ৰোগ
ফটকাৰ পৰা নিৰ্গত ধোঁৱাই গৰ্ভৱতী মহিলাৰ হাঁপানীৰ সমস্যাৰ সৃষ্টি কৰিব পাৰে ৷ ইয়াৰ বাবে গৰ্ভৱতী মহিলাৰ উশাহ-নিশাহ লোৱাত অসুবিধা হ’ব পাৰে ৷ এই কাৰণেই তেওঁলোকক ফটকাৰ পৰা আঁতৰি থাকিব লাগে ৷
মনত ৰাখিব এইবোৰ কথা
গৰ্ভাৱস্থাত ফটকাৰ দৰে ৰাসায়নিক বস্তুৰ পৰা দূৰত্ব বজাই ৰাখিব লাগে ৷ চাকি, লেম্প আৰু প্ৰাকৃতিক ধূপৰ কাঠি ব্যৱহাৰ কৰি কোনো পাৰ্শ্বক্ৰিয়া নোহোৱাকৈ দীপাৱলী পালন কৰিব পাৰি ৷ ঘৰ চাফা কৰাৰ পৰা নিৰ্গত হোৱা ধূলি, ফটকাৰ পৰা ওলোৱা ধোঁৱাই প্ৰদূষণ যথেষ্ট বৃদ্ধি কৰে ৷ এনে ক্ষেত্ৰত মাস্ক ব্যৱহাৰ কৰিব লাগে ৷
স্বাস্থ্য বিশেষজ্ঞসকলে কয় যে, গৰ্ভাৱস্থাৰ ০ৰ পৰা ৫ মাহৰ ভিতৰতো আপুনি ফটকা জ্বলাব পাৰে, কিন্তু সাত মাহৰ পৰা আপুনি অতি সাৱধান হোৱাটো প্ৰয়োজন ৷ কিন্তু ফটকা ফুটুওৱাৰ আগতে স্বাস্থ্য বিশেষজ্ঞৰ পৰামৰ্শ লোৱাটো জৰুৰী ৷
