দৈ হৈছে গাখীৰৰ দ্বাৰা উৎপন্ন এবিধ খাদ্য সামগ্ৰী ৷ আমি ইচ্ছা কৰিলেই গাখীৰৰ পৰা দৈ প্ৰস্তুত কৰি ল’ব পাৰো ৷ প্ৰকৃততে, বেক্টেৰিয়াৰ সান্নিধ্যত গাখীৰত ঘটা ৰাসায়নিক পৰিৱৰ্তনৰ ফলতেই দৈৰ সৃষ্টি হয় ৷ গাখীৰত লেক্টজ নামৰ এবিধ কাৰ্বহাইড্ৰেট থাকে আৰু বেক্টেৰিয়াই বিপাকীয় কাৰ্যৰ জৰিয়তে লেক্টজক লেক্টিক এচিডলৈ পৰিৱৰ্তন কৰে ৷ সময় বাঢ়ি যোৱাৰ লগে লগে দৈত সেই এচিডৰো পৰিমাণ বৃদ্ধি হয় ৷ পৰিণতিত দিন বঢ়াৰ লগে লগে দৈৰ টেঙা গুণো বৃদ্ধি পাবলৈ ধৰাত পুৰণা দৈ আমি বেছিকৈ টেঙা পাও ৷ আজি এই দৈৰ গুণাগুণ সম্পৰ্কে জানো আহক-
ৰোগ প্ৰতিৰোধ ক্ষমতা শক্তিশালী কৰে
দৈৰ লাভালাভবোৰৰ ভিতৰত এক অন্যতম হৈছে ই ৰোগ প্ৰতিৰোধ শক্তি বৃদ্ধি কৰে ৷ দৈয়ে ৰোগ সৃষ্টিকাৰী বীজাণুৰ সৈতে যুঁজ দি শৰীৰটোক সুস্থ কৰি ৰখাত সহায় কৰে ৷
হাড়-দাঁতৰ স্বাস্থ্য শক্তিশালী কৰে
দৈ কেলচিয়াম আৰু ফছফৰাছ সমৃদ্ধ ৷ কেলচিয়াম হৈছে আমাৰ হাড় আৰু দাঁতৰ ৰক্ষক ৷ প্ৰতিদিনে দৈ খোৱাটোৱে আপোনাৰ দৈনিক কেলচিয়াম আৰু ফছফৰাছৰ প্ৰয়োজনীয়তা যথেষ্ট পৰিমাণে পূৰণ কৰে ৷ ই আপোনাৰ হাড় শক্তিশালী কৰে আৰু আৰ্থ্ৰাইটিছ, অষ্টিওপোৰোচিছ, দাঁতৰ ক্ষয়, দুৰ্বল মাড়ি আদিৰ দৰে স্থিতিৰ আশংকা হ্ৰাস কৰে ৷
হজমশক্তি উন্নত কৰে
দৈ এক উত্তম প্ৰ'বায়োটিক খাদ্য ৷ যাৰ ফলত দৈ খালে ই হজমশক্তি উন্নত কৰাৰ লগতে অন্ত্ৰৰ স্বাস্থ্য ভালে ৰাখে ৷ ই পেট ফুলা সমস্যাৰো সামাধান কৰে ৷
ছালক পুষ্টি দিয়ে
দৈত জিংক, ভিটামিন চি আৰু কেলচিয়ামৰ দৰে অত্যাৱশ্যকীয় পুষ্টি থাকে ৷ এইসমূহ ছালৰ বাবে অতি উপকাৰী ৷ দৈ খালে ই ছালখন আৰ্দ্ৰ কৰি ৰখাত সহায় কৰে ৷ সদায় দৈ খোৱা আৰম্ভ কৰি আপুনি আপোনাৰ ছালখনক এক নতুন জীৱন প্ৰদান কৰিব পাৰে ৷আনহাতে, দৈৰ সৈতে নিমৰ পাত মিহিকৈ পিহি ছালৰ ৰোগ খৰ আদিত লগালে সেয়া সোনকালে ভাল হয় ৷
চুলিৰ স্বাস্থ্য উন্নত কৰে
ছাল-ছুলিৰ বাবে খুবেই উপকাৰী দৈ ৷ দৈৰে চুলি ধুলে চুলি ঘন, কোমল আৰু অধিক ক’লা হয় বুলি আয়ুৰ্বেদ শাস্ত্ৰত পোৱা যায় ৷টেঙা দৈৰে চুলি ধুলে মূৰৰ উফিও নাশ হয় ৷
ওজন হ্ৰাসত সহায়ক
ওজন হ্ৰাস কৰাৰ বাবে দৈ খোৱা ভাল ৷ ই ষ্টেৰইড হৰমন বা কৰ্টিচোলৰ বিকাশ প্ৰতিহত কৰে, যাৰ ফলত মেদবহুলতাৰ আশংকা নিয়ন্ত্ৰণ হয় ৷
লগতে পঢ়ক: অনিদ্ৰাৰ সমস্যাৰ বাবে আপুনি চিন্তিত নেকি ? তেন্তে খাবলৈ আৰম্ভ কৰক এইবিধ পানীয়
