উৎকোচ নিদিলে প্ৰাপ্য সুবিধাৰ পৰাও বঞ্চিত হয় প্ৰতিবন্ধী !!

কাৰ্যালয়ৰ কাম সমূহৰ বাবে জ্যোতিৰ্ময় বৰুৱাই প্ৰতিবন্ধী লোকসকলক নিজ ঘৰলৈ মাতি ঘৰত উৎকোচৰ বজাৰ বহোৱাৰ অভিযোগ কৰে সংগঠনটোৱে। এই সন্দৰ্ভত সংগঠনটোৱে উদ্ধতম কতৃপক্ষকো অৱগত কৰিছিল যদিও একো সুফল নোপোৱাত ক্ষোভ প্ৰকাশ কৰে সংগঠনটোৰ নেতৃত্বই।

ওদালগুৰি, 30 অক্টোবৰ: যি সময়ত প্ৰতিবন্ধী লোকসকলক বিভিন্ন সুবিধা প্ৰদানৰ বাবে চৰকাৰে ভিন্ন আঁচনি গ্ৰহণ কৰি আহিছে সেই সময়তে নিজ প্ৰাপ্যৰ ধন বিছৰিলেও সমাজ কল্যাণ বিষয়াৰ কাৰ্যালয়ত প্ৰদান কৰিবলগীয়া হৈছে বৃহৎ পৰিমাণৰ ধনৰ টোপোলা ৷ এই গুৰুত্বৰ অভিযোগ উত্থাপন হৈছে ওদালগুৰি জিলাৰ সমাজ কল্যাণ বিষয়াৰ কাৰ্যালয়ত কৰ্মৰত জ্যোতিৰ্ময় বৰুৱা নামৰ এজন কৰ্মচাৰীৰ বিৰুদ্ধে ৷ ইয়াৰোপৰি প্ৰতিবন্ধী সকলৰ বাবে ১২০০০ টকা আহিলে কৰ্মচাৰী জনক ৬০০০ টকা পৰ্যন্ত দিব লাগে বুলিও অভিযোগ কৰে ওদালগুৰি জিলা প্ৰতিবন্ধী সুৰক্ষা সংস্থাই ।

বুধবাৰে ওদালগুৰি জিলা প্ৰতিবন্ধী সুৰক্ষা সংস্থাৰ নেতৃত্বত শতাধিক প্ৰতিবন্ধী লোকে ওদালগুৰি জিলাৰ সহ আয়ুক্ত নিলাক্ষী বৈশ্যক সাক্ষাৎ কৰে ৷ চৰকাৰে আগবঢ়োৱা মাহিলি পেঞ্চনৰ লগতে অন্যান্য সুবিধাৰ বাবদ জ্যোতিৰ্ময় বৰুৱাই উৎকোচ লৈ অহা বিষয়টো সহ আয়ুক্তগৰাকীক লিখিতৰূপে জনায় সংস্থাটোৱে ।

উল্লেখ্য যে, কাৰ্যালয়ৰ কাম সমূহৰ বাবে জ্যোতিৰ্ময় বৰুৱাই প্ৰতিবন্ধী লোকসকলক নিজ ঘৰলৈ মাতি ঘৰত উৎকোচৰ বজাৰ বহোৱাৰ অভিযোগ কৰে সংগঠনটোৱে। এই সন্দৰ্ভত সংগঠনটোৱে উদ্ধতম কতৃপক্ষকো অৱগত কৰিছিল যদিও একো সুফল নোপোৱাৰ ক্ষোভ প্ৰকাশ কৰে সংগঠনটোৰ নেতৃত্বই। সেয়ে প্ৰয়োজনত আন্দোলনৰ কাৰ্যসূচী গ্ৰহণ কৰিব বুলিও হুংকাৰ দিয়ে সংগঠনটোৱে।