ওদালগুৰি, ২৭ জুলাইঃ এজন ড্ৰাইভাৰে ৰচনা কৰা মিছা ডকাইতিৰ নাটকে চাঞ্চল্যৰ সৃষ্টি কৰিছে ওদালগুৰিত । গাড়ীৰ পৰা প্ৰায় ২.১২ লাখ টকা ডকাইতি হোৱা বুলি নাটক ৰচনা কৰি শনিবাৰে ওদালগুৰি আৰক্ষীৰ জালত পৰিল গাড়ী চালক। জানিব পৰা মতে খাৰুপেটীয়াৰ ব্যৱসায়ী মনোজ জৈনে শুকুৰবাৰে বিভিন্ন চিপ্চ জাতীয় সামগ্ৰী প্ৰেৰণ কৰিছিল ওদালগুৰিৰ চঞ্জিৎ পালৰ ব্যৱসায়ীক প্ৰতিষ্ঠানলৈ । আনহাতে মনোজ জৈনৰ ব্যৱসায়ীক প্ৰতিষ্ঠানৰ গাড়ীচালক হাবিজুৰ ৰহমানে খাৰুপেটীয়াৰ পৰা এই সামগ্ৰী সমূহ এখন মালবাহী গাড়ীৰে কঢ়িয়াই আনিছিল । সামগ্ৰী সমূহ ওদালগুৰিৰ চঞ্জিৎ পালৰ ব্যৱসায়িক প্ৰতিষ্ঠানত নমাই গাড়ীচালক হাবিজুৰে সংগ্ৰহ কৰি নিছিল নগদ ২ লাখ ১২ হাজাৰ টকা । টকাৰ লগতে প্ৰায় ১৩ হাজাৰ টকাৰ কুপন সংগ্ৰহ কৰি হাবিজুৰে দিনৰ ১২ বজাত ৰাওনা হৈছিল খাৰুপেটীয়ালৈ ।
কিন্তু গাড়ীচালক জনে ওদালগুৰিৰে বাহিনীগাঁৱত দুখন বাইকত অহা ৪ জন দুৰ্বৃত্তই কাঢ়ি নিয়া বুলি অবগত কৰে ওদালগুৰি আৰক্ষীক । ইয়াৰ পিছতে তদন্ত আৰম্ভ কৰে ওদালগুৰি আৰক্ষীয়ে । শনিবাৰে আৰক্ষীয়ে সন্দেহবসত গাড়ীচালক হাবিজুৰক জেৰা কৰাত ওলাই পৰিল প্ৰকৃত তথ্য । আৰক্ষীৰ জেৰাত হাবিজুৰে টকা খিনি আন এজন আত্মীয়ৰ ঘৰত ৰাখি ডকাইট হোৱাৰ নাটক কৰা বুকি স্বীকাৰ কৰে। ইয়াৰ পিছতে আৰক্ষীয়ে গাড়ীচালক জনক গ্ৰেপ্তাৰ কৰাৰ লগতে লালপুলৰ হাবিজুৰৰ আত্মীয়ৰ ঘৰৰ পৰা জব্দ কৰে ১ লাখ ৯৯ হাজাৰ টকা । বৰ্তমান হাবিজুৰক ওদালগুৰি আৰক্ষী থানাত জেৰা কৰি থকাৰ লগতে দেওবাৰে আদালতত হাজিৰ কৰা হ'ব বুলি জনাই ওদালগুৰি আৰক্ষীয়ে৷
