এনআৰচিৰ শুনানিলৈ গৈ দুৰ্ঘটনাত পতিত ১২জনকৈ লোক

ওদালগুৰিত এনআৰচিৰ শুনানিত অংশ গ্ৰহণ কৰিবলৈ গৈ দুৰ্ঘটনাত পতিত হ'ল ১২জনকৈ লোক । আঘাত প্ৰাপ্ত লোক কেইজনক ৰাইজৰ সহযোগত ইকৰাবাৰী আৰক্ষীয়ে উদ্ধাৰ কৰি প্ৰেৰণ কৰে ৰৌতা আদৰ্শ চিকিৎসালয়লৈ ।

ওদালগুৰিৰ 8 আগষ্টঃ ওদালগুৰিৰ ৰৌতা থানাৰ অন্তৰ্গত সিধাখোৱা গাঁৱৰ পৰা ওদালগুৰিলৈ এনআৰচিৰ শুনানিৰ বাবে গৈ থাকোতে সংঘটিত হয় এক পথ দুৰ্ঘটনা৷ দুৰ্ঘটনাত আহত হয় ১২ জনকৈ লোক । জানিব পৰা মতে বৃহস্পতিবাৰে দিনৰ ১১ বজাত সিধাখোৱা গাঁৱৰ লোক কেইজনে AS-27C-5485 নম্বৰৰ এখন অটোৰে শুনানিলৈ গৈ থকা অৱস্থাত ইকৰাবাৰীৰ পথৰ কাষত নিয়ন্ত্ৰণ হেৰুৱাই বাগৰি পৰে৷ দুৰ্ঘটনাৰ ফলত কম বেছি পৰিমাণে আহত হয় শুনানিলৈ গৈ থকা লোক কেইজন । পিছত আঘাত প্ৰাপ্ত লোক কেইজনক ইকৰাবাৰী আৰক্ষীয়ে ৰাইজৰ সহযোগত উদ্ধাৰ কৰি ৰৌতা আদৰ্শ চিকিৎসালয়লৈ প্ৰেৰণ কৰে ।

আনহাতে সিধাখোৱা গাঁৱৰ আবিদা বেগম আৰু মহিৰুদ্দিনৰ অৱস্থা সংকটজনক হোৱাত হাস্পাতাল কৰ্তৃপক্ষই লোক দুজনক মঙলদৈ অসামৰিক চিকিৎসালয়লৈ উন্নত চিকিৎসাৰ বাবে প্ৰেৰণ কৰে বুলি জানিব পৰা গৈছে।