ওদালগুৰি আৰক্ষীৰ উদ্যোগত ফাতেহা দোৱোজ দহম

ওদালগুৰি আৰক্ষী চাউনিত প্ৰথমবাৰৰ বাবে উদযাপন কৰা হ’ল ইছলামসকলৰ ‘ফাতেহা দোৱাজ দহম’ অনুষ্ঠান ৷ আজিৰ এই অনুষ্ঠানৰ লগত সংগতি ৰাখি ৰচনা প্ৰতিযোগিতা, কুইজ প্ৰতিযোগিতা, বক্তৃতাৰ লগতে জিকিৰ আৰু কোৰাণ পাঠ অনুষ্ঠিত কৰে ওদালগুৰি আৰক্ষী প্ৰশাসনে ৷

ওদালগুৰি, 12 নৱেম্বৰঃ ওদালগুৰি আৰক্ষীৰ উদ্যোগত ওদালগুৰি আৰক্ষী চাউনিত প্ৰথমবাৰৰ বাবে উদযাপন কৰা হ’ল ইছলামসকলৰ ‘ফাতেহা দোৱাজ দহম’ অনুষ্ঠান ৷ এই পৱিত্ৰ অনুষ্ঠানক কেন্দ্ৰ কৰি সোমবাৰে উখল-মাখল হৈ পৰে ওদালগুৰি ৷ জিকিৰ-জাৰীৰ লগতে কোৰাণৰ বিভিন্ন বাণীৰে মুখৰিত হৈ পৰে আৰক্ষী চাউনীৰ চৌপাশ ৷

উল্লেখ্য যে, বিভিন্ন জাতি-জনগোষ্ঠী তথা ধৰ্মাৱলম্বীৰ লোকৰ মাজত একতা আৰু ভাতৃত্ববোধ স্থাপনৰ উদ্দেশ্যৰে বিভিন্ন সময়ত বিভিন্ন কাৰ্যসূচী গ্ৰহণ কৰি আহিছে ওদালগুৰি আৰক্ষী প্ৰশাসনে ৷ আজিৰ এই ফাতেহা দোৱাজ দহম অনুষ্ঠানৰ লগত সংগতি ৰাখি ৰচনা প্ৰতিযোগিতা, কুইজ প্ৰতিযোগিতা, বক্তৃতাৰ লগতে জিকিৰ আৰু কোৰাণ পাঠ অনুষ্ঠিত কৰে আৰক্ষী প্ৰশাসনে ৷ জাতি-বৰ্ণ-ধৰ্ম নিৰ্বিশেষে সকলো দল সংগঠন তথা ৰাইজে অংশগ্ৰহণ কৰে ফাতেহা দোৱাজ দহম অনুষ্ঠানত ৷ অনুষ্ঠানত উপস্থিত থাকি সকলোৱে জিলা প্ৰশাসনক ধন্যবাদ জনোৱাৰ লগতে ইছলাম যে এটা শান্তিৰ ধৰ্ম ইয়াৰ বাখ্যা কৰে ৷

আজিৰ এই ফাতেহা দোৱাজ দহম অনুষ্ঠানত ওদালগুৰি আৰক্ষী অধীক্ষক লংনিত তেৰাং, অতিৰিক্ত আৰক্ষী অধীক্ষক মায়ং কুমাৰ, উপ-আৰক্ষী অধীক্ষক মইদুল ইছলামৰ লগতে কেইবাজনো জ্যেষ্ঠ আৰক্ষী বিষয়া, ৰাজহ চক্ৰ বিষয়াৰ লগতে সংগঠনৰ নেতা উপস্থিত থাকে ৷