টীয়ক, 4 জানুৱাৰীঃ টীয়কত ৰাজ্যসভাৰ সাংসদ কামাখ্যা তাছাৰ প্ৰতিকৃতি দাহ আছুৰ ৷ ৰাজ্যসভাৰ সাংসদ কামাখ্যা প্ৰসাদ তাছাই বিজেপিৰ বুথ কমিটিৰ বৈঠকত সদৌ অসম ছাত্ৰ সন্থাক লৈ বিৰূপ মন্তব্য আগবঢ়োৱাৰ প্ৰতিবাদত টীয়ক প্ৰতিকৃতি দাহ কৰে সাংসদগৰাকীৰ ৷ টীয়কৰ মিধাখাত তিনিআলিত টীয়ক আঞ্চলিক ছাত্ৰ সন্থা,শিমলুগুৰি মৌজা আছু আৰু টীয়ক আঞ্চলিক চুতীয়া ছাত্ৰ সন্থাই ৰূপায়ণ কৰে এই কাৰ্যসূচীৰ ৷ কামাখ্যা তাছা মুর্দাবাদ,কামাখ্যা তাছাৰ কাম নাই,CAA আমি নামানো,বিজেপি গ' বেক আদি ধ্বনি দি আকাশ বতাহ কঁপাই তোলে আছু কৰ্মীয়ে ৷
আনহাতে টীয়ক আঞ্চলিক ছাত্ৰ সন্থাৰ সভাপতি ৰন্টু ভূঞাই তীব্ৰ সকিয়নী প্ৰদান কৰি কয়,CAA আমি অসমীয়াই কেতিয়াও নামানো, ৰাজপথত সংগ্ৰাম কৰি আজি ৰাজ্যসভাৰ সাংসদ হোৱা তাছাক ৰাজপথৰ সংগ্ৰামক তুচ্ছ-তাচ্ছিল্য কৰা কামাখ্যা তাছাক অসমৰ ৰাইজে ক্ষমা নকৰে বুলি তীব্ৰ ভাষাৰে সমালোচনা কৰে। আনহাতে যোৰহাট মহকুমা ছাত্ৰ সন্থাৰ সাংগঠনিক সম্পাদক যদুমণি বৰুৱাই সাংসদ তাছাৰ মন্তব্যক সমালোচনা কৰি অসমৰ ৰাইজে নায্য প্ৰাপ্তিৰ বাবে সংগ্ৰাম কৰিছে আৰু অসমৰ ৰাইজে এই সংগ্ৰামৰ মূল্য পাবই বুলি মন্তব্য কৰে।
