শদিয়া, 3 নৱেম্বৰঃ শনিবাৰে তিনিচুকীয়াৰ কাকপথাৰৰ হাঁহখাটিত বনৰীয়া হাতীৰ সাত, আঠজনীয়া জাকে এটা ঘৰত প্ৰবেশ কৰি বাসগৃহটো লণ্ডভণ্ড কৰে ৷ লগতে ঘৰৰ বহু মূল্যবান সামগ্ৰী ভাঙি চুৰমাৰ কৰে ৷ সন্ধিয়া প্ৰায় ৮ মান বজাত হাঁহখাটি উষাপুৰ চুবুৰিটোৰ দেৱেশ্বৰ ৰাজখোৱা নামৰ লোকজনৰ গৃহত হাতীৰ জাকটো প্ৰৱেশ কৰাত পৰিয়ালটোৱে কোনোমতে জীৱন ৰক্ষা কৰিবলৈ সক্ষম হয় ৷ ডুমডুমা বন সংমণ্ডলৰ মেছাকি সংৰক্ষিত বনাঞ্চলৰ পৰা খাদ্যৰ সন্ধানত অহা হাতীৰ জাকটোৱে গাঁওখনৰ বহু পৰিয়ালৰ ঘৰত প্ৰবেশ কৰি এনে অত্যাচাৰ কৰি অহা কথা গাঁওবাসীয়ে জানিবলৈ দিয়ে ৷ অৱশ্যে ঘটনা সংঘটিত হোৱাৰ পিছত স্থানীয় গাঁওবুঢ়াৰ তৎপৰতাত বন বিভাগৰ কৰ্মচাৰী উপস্থিত হৈ ক্ষয়-ক্ষতিৰ বুজ লয় ৷
কাকপথাৰত বন্যহস্তীৰ তাণ্ডৱ
