ডুমডুমা , 5 জুনঃ সংবাদ মাধ্যম তথা সামাজিক মাধ্যমত বিৰ্তকৰ শীৰ্ষত থকা বাঘজান ঘটনাৰ পৰিস্থিতিৰ বুজ ল’বলৈ শুকুৰবাৰে বাঘজানত উপস্থিত হয় আলফাৰ যুদ্ধবিৰতি গোটৰ এটা দল ৷ তৈলখাদৰ পৰা গেছ নিৰ্গত কাৰ্যৰ বাবে নিজ বাসগৃহৰ পৰা স্থানান্তৰ কৰা লেকসকলক আশ্ৰয় শিবিৰত সাক্ষাৎ কৰে যুদ্ধবিৰত গোটৰ নেতা প্ৰবাল নেওগ সহ এটা দলে ৷
উল্লেখ্য যে,শুকুৰবাৰে বাঘজান অঞ্চলত গেছ নিৰ্গত কাৰ্যই 10 দিনত ভৰি দিছে ৷ "তেল আমাক লাগে,কিন্তু মানুহ, জীৱ-জন্তু আৰু প্ৰকৃতিক ধ্বংস কৰি অইলক তৈল খনন কৰিবলৈ দিয়া নহ'ব" বাঘজান অঞ্চল ভ্ৰমণ কৰাৰ পাছতেই সংবাদ মাধ্যমৰ আগত এই মন্তব্য প্ৰবাল নেওগৰ ৷ অন্যহাতে,অইল ইণ্ডিয়াই কোনো উন্নত প্ৰযুক্তি ব্যৱহাৰ নকৰি কেৱল মাত্ৰ বেপাৰী মনোভাৱেৰে অসমত তৈল খনন আৰু উৎপাদন কাৰ্য চলাই আছে বুলিও মন্তব্য কৰে নেতা গৰাকীয়ে ৷ উল্লেখযোগ্য যে,তৈলখাদটোৰ গেছ নিৰ্গমন বন্ধ কৰিবলৈ বিদেশৰ পৰা এটা বিশেষজ্ঞৰ দল অহাৰ কথা অইল ইণ্ডিয়া কৰ্তৃপক্ষই জনাইছিল যদিও আজি দহ দিন পাৰ হৈ যোৱাৰ পাছতো বৰ্তমান পৰ্যন্ত বাঘজানত আহি উপস্থিত হোৱা নাই বিদেশৰ কোনো বিশেষজ্ঞৰ দল ।
