তিনিচুকীয়া, 16 অক্টোবৰ : তিনিচুকীয়াত এগৰাকী শিক্ষাগুৰুক ৰাজহুৱাকৈ অপমান কৰা ঘটনাৰ বিৰুদ্ধে ৰাজ্যজুৰি অব্যাহত আছে প্ৰতিক্ৰিয়া ৷ শনিবাৰে তিনিচুকীয়া জিলাৰ উপযুক্ত উপস্থিত ফিল'বাৰীত এখন ৰাজহুৱা সভাৰ আহ্বান জনোৱা হয় । উক্ত সভাত জিলা উপায়ুক্তৰ লগতে বিদ্যালয়খনৰ প্ৰাক্তন আৰু বৰ্তমানৰ শিক্ষাৰ্থী, অভিভাৱক আৰু স্থানীয় ৰাইজ উপস্থিত থাকে ।
ফিল'বাৰীৰ চিনিয়ৰ ছেকেণ্ডেৰী বিদ্যালয়ত অনুষ্ঠিত হয় এই সভাখন । সভাত বিদ্যালয়খনৰ বৰ্ধিত মাছুলৰ লগতে অনাকাংক্ষিত ঘটনাটোৰ সন্দৰ্ভতো আলোচনা কৰা হয় ৷ ইতিমধ্যে শুকুৰবাৰে সদৌ অসম ছাত্ৰ সন্থায়ো এই দুৰ্ভাগ্যজনক ঘটনা সন্দৰ্ভত শিক্ষয়িত্ৰীগৰাকীৰ ওচৰত ক্ষমা বিচাৰিছে ।
ফিল'বাৰী ছিনিয়ৰ ছেকেণ্ডাৰী বিদ্যালয়ৰ শিক্ষয়িত্ৰী নিৰদা বৰাক অপমানিত কৰাৰ পিছতে শুকুৰবাৰে শিক্ষয়িত্ৰীগৰাকীৰ ঘৰত উপস্থিত হয় ফিল'বাৰীৰ সকলো দল-সংগঠনৰ প্ৰতিনিধি । তেওঁলোকে শিক্ষয়ত্ৰীগৰাকীৰ ওচৰত আঠুলৈ এই ঘটনাৰ বাবে ক্ষমা প্ৰাৰ্থনা কৰে ৷
উল্লেখ্য যে, ফিল'বাৰীৰ চিনিয়ৰ ছেকেণ্ডেৰী বিদ্যালয়ত বৰ্ধিত মাছুলক লৈ কেইবাটাও ছাত্ৰ সংগঠনে ছাত্ৰ-ছাত্ৰীক লৈ বিদ্যালয়ৰ সন্মুখত প্ৰতিবাদ সাব্যস্ত কৰাৰ লগতে অপ্ৰীতিকৰ পৰিস্থিতিৰ সৃষ্টি কৰিছিল ৷ যাৰ পাছত শিক্ষয়িত্ৰীগৰাকীৰ ছাত্ৰ-ছাত্ৰীৰ ওচৰত আঁঠু লৈ ক্ষমা খুজিবলগীয়া হৈছিল ৷ এই ঘটনাৰ পাছতেই তিনিচুকীয়া জিলাৰ ছাত্ৰ সন্থাৰ উপসভাপতি কৰ্ণ বুঢ়াগোঁহাইক ছাত্ৰ সন্থাৰ পৰা বহিষ্কাৰ কৰা হয় ।
তিনিচুকীয়া জিলাৰ ছাত্ৰ সন্থাৰ উপসভাপতিগৰাকীক বহিষ্কাৰ কৰাৰ পাছতেই আঞ্চলিক ছাত্ৰ সংগঠনটোৰ মাজত তীব্ৰ প্ৰতিক্ৰিয়াৰ সৃষ্টি হৈছে ৷ ইতিমধ্যে কৰ্ণ বুঢ়াগোঁহাইৰ বহিষ্কাৰৰ বিৰোধিতা কৰি ফিল’বাৰী আঞ্চলিক ছাত্ৰ সন্থাৰ সকলো সদস্যই পদত্যাগৰ কথা উল্লেখ কৰি ছাত্ৰ সংগঠনটোৰ নেতৃত্বলৈ পত্ৰ প্ৰেৰণ কৰিছে ৷
লগতে পঢ়ক : বৰ্ধিত মাছুলক লৈ প্ৰতিবাদ: আঁঠু লৈ শিক্ষয়িত্ৰীয়ে খুজিলে ক্ষমা
