শদিয়া, 24 ছেপ্তেম্বৰ: "মানুহে মানুহৰ বাবে যদিহে অকনো নাভাবে,অকণি সহানুভূতিৰে ভাৱিব কোনেনো কোৱা সমনীয়া" ভাৰত ৰত্ন সুধাকণ্ঠ ভূপেন হাজৰিকাই গীতৰ মাজেৰে কৈ যোৱা এই কথাষাৰকে সাৰোগত কৰি মানৱীয়তাৰ চৰম নিদৰ্শন দাঙি ধৰিছে শদিয়াৰ এজন বনবিভাগৰ কৰ্মচাৰীৰ নেতৃত্বত গঢ় লৈ উঠা এটি ফেচবুক গ্ৰুপৰ সদস্য সকলে ৷ বৰ্তমান অসম চৰকাৰৰ বন্য বিভাগৰ এজন কৰ্মচাৰী কৃষ্ণকান্ত গগৈ আৰু তেওঁৰ সহপাঠী,বন্ধু বৰ্গৰ সহযোগত গঢ় লৈ উঠা এটা ফেচবুক গ্ৰুপ "প্ৰেৰণা" ৷ বহু সময়ত আৰ্তজনৰ কাষত থিয় হৈ সহায়ৰ হাত আগবঢ়াই আহিছে এই গ্ৰুপটোৰ লগত জড়িত সদস্য সকলে ৷ বৰ্তমান বহু কেইগৰাকী অসহায় গৃহহীন লোকক আশ্ৰয়ৰ উপযোগী হোৱাকৈ গৃহ নিৰ্মাণ কৰিবলৈ আগবাঢ়ি আহিছে এই গ্ৰুপটোৰ সদস্য সকল ৷
শেহতীয়াকৈ এই গ্ৰুপটোৰ মহান নিদৰ্শন দেখিবলৈ পোৱা গ’ল 126 নং শদিয়া বিধানসভা সমষ্টিৰ অন্তৰ্গত বৰালি গাঁৱৰ এগৰাকী স্বামীহীনা মহিলা তথা তিনিটি সন্তানৰ মাতৃ ৷ স্বামীয়ে দ্বিতীয় বিবাহ কৰি নিঠৰুৱা কৰি এৰি থৈ গৈছিল নিভা বড়া নামৰ মহিলা গৰাকীক ৷ তেখেতৰ দুখৰ কথা কৃষ্ণ কান্ত গগৈৰ লগতে "প্ৰেৰণা" গ্ৰুপটোৱে জানিব পাৰি মহিলাগৰাকীৰ গৃহ নিৰ্মাণ কৰি দিয়াৰ প্ৰতিশ্ৰুতি দিছিল ৷ আৰু তাৰেই পৰিপ্ৰেক্ষিতত সোমবাৰে "প্ৰেৰণা" গ্ৰুপৰ সৈতে জড়িত সকলো সদস্যই মিলি পুনৰ নিৰ্মাণ কৰি দিয়ে মহিলাগৰাকীৰ জৰাজীৰ্ণ গৃহটি ৷ কৃষ্ণকান্ত গগৈয়ে জনোৱা অনুসৰি উক্ত মহিলা গৰাকীৰ ভগা প্ৰজাটি নিৰ্মাণৰ ক্ষেত্ৰত স্থানীয় বিধায়ক বলিন চেতিয়াই তেওঁলোকৰ সৈতে যোগাযোগ কৰি কিছু সহায় আগবঢ়াইছে ৷ গতিকে এই ক্ষেত্ৰত বিধায়ক জনক ধন্যবাদ জ্ঞাপন কৰাৰ লগতে এই মহান পদক্ষেপক সহযোগিতা আগবঢ়োৱাৰ বাবে উদ্যোমী যুৱক প্ৰশান্ত,তেখেতৰ সতীৰ্থ বন্ধু বুদ্ধেশ্বৰৰ লগতে "প্ৰেৰণা" গ্ৰুপৰ সৈতে জড়িত সকলো বন্ধুবৰ্গ আৰু বিশেষ ভাৱে কাকপথাৰৰ সাংবাদিক ৰাতুল,মিন্টু,ইন্দ্ৰজিত,মন্টু, অমৃতক ধন্যবাদ জ্ঞাপন কৰে কৃষ্ণ কান্ত গগৈয়ে ৷
"প্ৰেৰণা" ফেচবুক গ্ৰুপৰ এই প্ৰচেষ্টাতে এতিয়া এটি পানী নপৰা ঘৰত দিন কটাবলৈ সক্ষম হৈছে তিনিটা সন্তানৰ মাতৃ নিভা বড়াসহ পৰিয়ালটোৱে ৷
