তিনিচুকীয়া, 24 মে’ : তিনিচুকীয়া জিলাৰ মাৰ্ঘেৰিটা সমষ্টিৰ অন্তৰ্গত দুৱাৰমৰা গাঁও পঞ্চায়তৰ ২ নং নলনী গাঁৱৰ বাট-পথসমূহৰ বিধ্বস্ত আৰু জৰাজীৰ্ণ অৱস্থাই স্থানীয় লোকক জলা-কলা খুৱাইছে ৷ অতিকৈ পিছপৰা তথা অনুন্নত মৌজা হিচাপে পৰিচিত বুঢ়ীদিহিং মৌজাৰ দুৱাৰমৰা পঞ্চায়তৰ অন্তৰ্গত অধিকাংশ বাট পথ বাৰিষাৰ সময়ত যাতায়তৰ বাবে অনুপযোগী হৈ পৰে । এজাক বৰষুণতেই পথৰ মাজত গাঁত হৈ পৰা অংশসমূহত পানী জমা হৈ পথাৰ তথা পুখুৰী সদৃশ ৰূপ লয় । যাৰবাবে বাৰিষাৰ সময়ত এই পথেদি যাতায়ত কৰাটো গাঁওবাসীৰ বাবে এক প্ৰকাৰৰ যমৰ-যাতনা ভোগ কৰাৰ দৰেই হৈ পৰে ।
নলনী গাঁৱৰ ৰাইজে ৰোগীক চিকিৎসালয়লৈ প্ৰেৰণ কৰা, পথাৰত উৎপাদিত সামগ্ৰী বিক্ৰীৰ বাবে বজাৰলৈ নিয়া আদি বিভিন্ন ক্ষেত্ৰত বিভিন্ন সময়ত বিধ্বস্ত পথটোৰ বাবে সমস্যাৰ সন্মুখীন হৈ আহিছে ৷ অঞ্চলটোৰ যাতায়তৰ একমাত্ৰস্থল পথটো শীঘ্ৰে পুনৰ নিৰ্মাণ কৰি দিয়াৰ বাবে মাৰ্ঘেৰিটা সমষ্টিৰ বিধায়ক ভাস্কৰ শৰ্মাক আহ্বান জনাইছে স্থানীয় লোকে ।
লগতে পঢ়ক : ঘূৰ্ণী বতাহ য়াছ : সাজু 11 খন হেলিকপ্তাৰ আৰু 25 খন বিমান
