ডুমডুমা,শদিয়া, আগষ্ট 18: এক লোমহৰ্ষক ঘটনা সংঘটিত হৈছে শদিয়াৰ ইছলামপুৰ গাঁৱত ৷ শুকুৰবাৰে একে গাঁৱৰে এগৰাকী মহিলাৰ ঘৰৰ পৰা কুকুৰা আনিবলৈ গৈছিল দীপক বিশ্বকৰ্মা নামৰ যুৱকজন ৷ কিন্তু কুকুৰা আনিবলৈ যোৱাই কাল হ'ল দীপকৰ ৷ গাঁওখনৰ একাংশ উদণ্ড যুৱকে দীপকক সন্দেহ বশতঃ চোৰ সজাই খুটাত বান্ধি মাৰ-ধৰ কৰে ৷ এই ঘটনাত স্থানীয় ৰাইজেও সহযোগিতা আগবঢ়াই যুৱককেইজনক ৷ গুৰুতৰভাৱে আহত দীপকক শদিয়া চিকিৎসালয়ত ভৰ্তি কৰোৱা হয় যদিও যুৱকজনৰ অৱস্থা সংকটজনক হোৱাত ডিব্ৰুগড় চিকিৎসা মহাবিদ্যালয়লৈ প্ৰেৰণ কৰা হয় । উন্মাদ জনতাৰ নিৰ্মম আক্ৰমণত গুৰুতৰভাৱে আহত হোৱা দীপক বিশ্বকৰ্মাই প্ৰাণ হেৰুৱাই ডিব্ৰুগড় চিকিৎসা মহাবিদ্যালয়ত ৷অৱশ্যে ঘটনা সন্দৰ্ভত আৰক্ষীয়ে আটক কৰিছে ইছলামপুৰ গাঁৱৰ দিব্যধৰ চিৰিং নামৰ এজন লোকক ৷
শদিয়াত দলবদ্ধ আক্ৰমণত নিহত যুৱক
