মাৰ্ঘেৰিটা,29আগষ্টঃ বন্ধ হৈ যাব নেকি উত্তৰ পূব কয়লা ক্ষেত্ৰ মাৰ্ঘেৰিটা? প্ৰতিষ্ঠানটোৰ বিষয়া কৰ্মচাৰী সকলক তাৎক্ষণিক ভাৱে অন্য কয়লা ক্ষেত্ৰলৈ বদলিৰ আবেদনৰ নিৰ্দেশ দিয়াক লৈ সকলোৰে মনত সৃষ্টি হৈছে এই প্ৰশ্নৰ ৷ বৃহস্পতিবাৰে এই বিষয়ক লৈ কয়লা শ্ৰমিক সংগঠনসমূহৰ নেতৃত্বত কেইবাশতাধিক শ্ৰমিক কৰ্মচাৰীয়ে উত্তৰ-পূব কয়লা ক্ষেত্ৰ মাৰ্ঘেৰিটাৰ মহাপ্ৰবন্ধকৰ কাৰ্যালয় ঘেৰাও কৰি প্ৰতিষ্ঠানটোৰ কলকাতাস্থিত মুখ্য কাৰ্যালয়ৰ এই হঠকাৰী সিদ্ধান্তুৰ তীব্ৰ বিৰোধিতা কৰে । প্ৰাপ্ত তথ্য মতে, প্ৰতিষ্ঠানটোৰ কলকাতা স্থিত মুখ্য কাৰ্যালয়ৰ পৰা শ্ৰমিক-কৰ্মচাৰী সকলক দেশৰ অন্য প্ৰান্তত থকা কয়লা ক্ষেত্ৰ সমূহলৈ বদলিৰ বাবে আবেদন জনোৱা হৈছে উৰ্ধতম কৰ্তৃপক্ষৰ ফালৰ পৰা ৷ শ্ৰমিক সকলৰ ভৱিষ্যত অনিশ্চিত হৈ পৰাত কেইবাশতাধিক শ্ৰমিক কৰ্মচাৰীয়ে উত্তৰ পৃব কয়লা ক্ষেত্ৰ মাৰ্ঘেৰিটাৰ মহাপ্ৰবন্ধকৰ কাৰ্যালয় ঘেৰাও কৰি প্ৰতিবাদ কৰাৰ লগতে অসম চৰকাৰৰ পৰা ক্ষতিপূৰণ বিচাৰিছে ৫৬ কোটি টকা ৷
প্ৰতিবাদী কাৰ্যসূচীৰ পাছত দিহিং গেষ্ট হাউচত এখন সংবাদমেল অনুষ্ঠিত কৰি লেখাপানী কয়লা প্ৰকল্পৰ বাবে উত্তৰ পূব কয়লা ক্ষেত্ৰক অসম চৰকাৰে দিয়া দুশ পঞ্চাশ হেক্টৰ ভূমি অৰুণাচল চৰকাৰে নিজা বুলি দাবী কৰি নামফলক পৰ্যন্ত মৰাৰ বিস্ফোৰক অভিযোগ দিয়ে শ্ৰমিক সংগঠন সমূহে ।
