ডুমডুমা,12 জানুৱাৰী : ডুমডুমা এফআৰইউত চিকিৎসাকৰ্মীক আক্ৰমণ একাংশ লোকৰ ৷ দুৰ্ঘটনাত গুৰুতৰভাৱে আহত এজন লোকক চিকিৎসা প্ৰদান নকৰাৰ অভিযোগত উত্তেজিত একাংশ লোকে আক্ৰমণ চলায় চিকিৎসালয়খনৰ চিকিৎসাকৰ্মীৰ ওপৰত ৷ ঘটনা অনুসৰি ডুমডুমাৰ সমীপৰ বিছাকুপিত এক পথ দুৰ্ঘটনাত গুৰুতৰভাৱে আহত হৈছিল ফুলেশ্বৰ বৰ্মন নামৰ এজন লোক ৷ মুমূৰ্ষ অৱস্থাত পথৰ দাঁতিত পৰি থকা লোকজনক ততাতৈয়াকৈ ডুমডুমা এফআৰইউলৈ অনা হয় যদিও চিকিৎসকে বহু সময় লোকজনক চিকিৎসা প্ৰদান নকৰাৰ বাবে লোকজনৰ মৃত্যু হোৱা বুলি অভিযোগ ৰাইজৰ ৷ যাৰ বাবে একাংশ উত্তেজিত লোকে কৰ্তব্যৰত চিকিৎসক আৰু নাৰ্চক শাৰিৰীক ভাৱে প্ৰহাৰ কৰাৰ অভিযোগ উত্থাপন হৈছে ৷
ইয়াৰ বিপৰীতে চিকিৎসালয় খনত কৰ্তব্যৰত চিকিৎসকে জনোৱা অনুসৰি লোকজনক মৃত অৱস্থাতে চিকিৎসালয়ৈ অনা হৈছিল ৷ পৰৱৰ্তী সময়ত চিকিৎসালয়খনত ডুমডুমা আৰক্ষী উপস্থিত হৈ পৰিস্থিতি নিয়ন্ত্ৰণৰ চেষ্টা চলায় যদিও একাংশ লোকে আৰক্ষীৰ সৈতেও তৰ্কত লিপ্ত হয় ৷ আনহাতে, দুৰ্ঘটনাটো সন্দৰ্ভত ডুমডুমা আৰক্ষীৰ প্ৰাথমিক তদন্তত প্ৰকাশ পাইছে যে, মটৰ চাইকেল আৰোহী জনে নিয়ন্ত্ৰণ হেৰুৱাই পথৰ দাঁতিত থকা ৰেল বিভাগৰ খুটাত খুন্দিওৱাৰ ফলতে মূৰত গুৰুতৰভাৱে আঘাতপ্ৰাপ্ত হৈ মৃত্যুবৰণ কৰে ৷
