ধ্বংসৰ পথত আমাজন অফ ইষ্ট নামে খ্যাত দিহিং-পাটকাই বৰ্ষা অভয়াৰণ্য ৷ দেশত চলি থকা লক ডাউনৰ মাজতে অভয়াৰণ্যখনৰ 98.59 হেক্টৰ ভূমিত কয়লা খননৰ বাবে অনুমতি প্ৰদান কৰিছে নেচনেল বৰ্ড অফ ৱাইল্ডলাইফে ৷ চৰকাৰৰ এনে হঠকাৰী সিদ্ধান্তৰ বাবে এতিয়া ক্ষুন্ন হৈ পৰিছে অসমৰ ৰাইজ ৷ জৈৱ বৈচিত্ৰৰে ভৰপূৰ দিহিং পাটকাই ৰক্ষা কৰাৰ বাবে আগবাঢ়ি আহিছে অসমৰ ছাত্ৰসমাজৰ লগতে বভিন্ন দল সংগঠন ৷ ইয়াৰ তীব্ৰ বিৰোধিতাৰে গুৱাহাটী বিশ্ববিদ্যালয়ৰ ইক' ক্লাৱে আৰম্ভ কৰিছে এক অনলাইন প্ৰতিবাদী কাৰ্যসূচী ৷ সামাজিক মাধ্যমত ইতিমধ্যেই #SaveDehingPatkai শীৰ্ষক এক ব্যাপক অভিযান আৰম্ভ কৰিছে গুৱাহাটী বিশ্ববিদ্যালয়ৰ ছাত্ৰসমাজে ৷
উল্লেখযোগ্য যে দিহিং পাটকাই বৰ্ষাৰণ্যত খনন চলালে প্ৰকৃতিৰ বুকুৰ পৰা হয়টো চিৰ দিনৰ বাবে হেৰাই যাব বহু দুস্প্ৰাপ্য জীৱ-জন্তু ৷ হেৰাই যাব ২৯৩ টা প্ৰজাতিৰ চৰাই, ৫৭টা প্ৰজাতিৰ উভচৰ প্ৰাণী, 30 টা প্ৰজাতিৰ পখিলা, ৪৭ টা বিভিন্ন প্ৰজাতিৰ স্তনপায়ী প্ৰাণী, ১০০ বিধ দুস্প্ৰাপ্য অৰ্কিডৰ লগতে হলৌ বান্দৰ, লাজুকী বান্দৰ আৰু গাহৰী নেজীয়া বান্দৰ ৷ যাৰ বাবে কেন্দ্ৰ চৰকাৰৰ এনে হঠকাৰী সিদ্ধান্তৰ বিৰুদ্ধে গৰজি উঠিছে ৰাজ্যৰ বহু দল সংগঠন ৷
সমগ্ৰ বিষয়টোক লৈ গভীৰ উদ্বেগ প্ৰকাশ কৰি চৰকাৰক এই সিদ্ধান্ত বাতিল কৰিবলৈ দাবী জনাইছে সদৌ মৰাণ ছাত্ৰ সন্থাৰ সভাপতি অৰুণজ্যোতি মৰাণে ৷ইয়াৰ উপৰিও প্ৰকৃতিপ্ৰেমী মোবিনা আখতাৰে এই সন্দৰ্ভত প্ৰতিক্ৰিয়া প্ৰকাশ কৰি কয় যে, দিহিং-পাটকাই বৰ্ষা অভয়াৰণ্যৰ চেলেকি হস্তী অভয়াৰণ্যত কয়লা খনন নতুন কথা নহয় ৷ অভয়াৰণ্যখনত ১৯৭৩ চনৰে পৰা অবৈধ ভাবে কয়লা খনন কাৰ্য চলি আছে ৷ এতিয়া মাত্ৰ অভয়াৰণ্যখনত বৈধ ভাবে কয়লা খননৰ অনুমতিহে প্ৰদান কৰা হৈছে ৷ অভয়াৰণ্যখনত অবৈধ কয়লা খনন সম্পৰ্কে ৰাজ্য আৰু কেন্দ্ৰ চৰকাৰ পূৰ্বৰে পৰা জ্ঞাত আছিল বুলিও গুৰুত্বপূৰ্ণ মন্তব্য কৰে মবিনা আখতাৰে ৷
