তিনিচুকীয়া,২৮ জানুৱাৰী : তাহানিৰ চাইনা টাউনখ্যাত তিনিচুকীয়া জিলাৰ মাকুমৰ লগতে তিনিচুকীয়া চহৰত আজিও বসবাস কৰি আছে কেইবাটাও চীনামূলীয় পৰিয়ালে (Chinese origin families in Tinsukia)। দেশ স্বাধীন হোৱাৰ পূৰ্বেই ব্ৰিটিছৰ শাসন কালতে অসমলৈ কৰ্মসূত্ৰে আহিছিল চীনামূলীয় পৰিয়ালকেইটা । অসমৰ তিনিচুকীয়াৰ লগতে আন বিভিন্ন প্ৰান্তত কাঠৰ মিলৰ লগতে চাহ বাগিচাৰ বিভিন্ন পদত কৰ্মৰত হৈ আছিল পৰিয়ালকেইটাৰ সদস্য । পৰৱৰ্তী সময়ত ভাৰতে স্বাধীনতা লাভ কৰাৰ পাছতো অসমতে নিগাজীকৈ থাকিবলৈ লৈছিল চীনামূলীয় পৰিয়ালকেইটাই । মাকুমৰ এই চীনামূলীয় লোকসকলক বিষয়বস্তু হিচাপে লৈয়েই প্ৰখ্যাত লেখিকা ৰীতা চৌধুৰীয়ে ৰচনা কৰিছিল "মাকাম" নামৰ বিখ্যাত উপন্যাসখন ৷
তিনিচুকীয়া জিলাখনৰ মাকুমত চীনা পৰিয়ালৰ এখন বৃহৎ গাঁও থকাৰ উপৰিও বিদ্যালয়, ক্লাৱ আদিও স্থাপন কৰিছিল চীনা মূলৰ লোকসকলে । ১৯৬২ চনৰ চীন ভাৰতৰ যুদ্ধৰ পিছতে অঞ্চলটোৰ বহুলোক চীন দেশলৈ উভতি যোৱাৰ বিপৰীতে ভাৰততে থাকি গৈছিল কেইটামান পৰিয়াল । পৰৱৰ্তী সময়ত মাকুমৰ লগতে তিনিচুকীয়াৰ বিভিন্ন প্ৰান্তত চীনামূলীয় পৰিয়ালকেইটা সিচঁৰিত হৈ থকাৰ লগতে চীনা লোকসকলে মাকুমত স্থাপন কৰা বিদ্যালয়খনক মাকুম জংচন হিন্দী বিদ্যালয় হিচাপে নামাকৰণ কৰা হয় (Chinese family of Makum)।
ইফালে, বৌদ্ধ ধৰ্ম গ্ৰহণ কৰি মাকুমত লি খাই ৱেন নামৰ লোকজনৰ এটা পৰিয়াল আৰু তিনিচুকীয়াত ৱাঁং ছোং চিন নামৰ লোক এজনৰ এটা পৰিয়ালে অসমীয়া সমাজ জীৱনৰ সৈতে মিলি বসবাস কৰি আছে । বৰ্তমান তিনিচুকীয়াত বাস কৰা চীনামূলীয় পৰিয়ালকেইটাই ঘৰত অসমীয়া, হিন্দী ভাষাত বাৰ্তালাপ কৰাৰ লগতে সম্পূৰ্ণ অসমীয়া সংস্কৃতি গ্ৰহণ কৰিছে । কেৱল চীনা দুই এটা শব্দহে দুই এজনে ক'ব পাৰে (Chinese origin families accepts Assamese tradition) ৷ সাধাৰণতে ঘৰত এতিয়াও চীনা খাদ্য গ্ৰহণ কৰাৰ লগতে সিদ্ধ আহাৰ আৰু বাহঁৰ টেঙা (খৰিচা) খাই ভাল পাই বুলি জানিবলৈ দিয়ে পৰিয়ালকেইটাৰ এগৰাকী সদস্যই ৷
