শদিয়া,16 আগষ্ট: শিশু শ্ৰমিক ৰোধ কৰিবৰ বাবে চৰকাৰে কঠোৰ আইন প্ৰনয়ন কৰাৰ পাছতো দেশৰ লগতে ৰাজ্যত অব্যাহত আছে শিশু শ্ৰমিক ব্যৱহাৰৰ ঘটনা ৷ আন বিভিন্ন খণ্ডৰ সমান্তৰালকৈ অসমৰ চাহ উদ্যোগটোতো নিয়োজিত হৈ আছে বহু শিশু শ্ৰমিক৷ শেহতীয়াকৈ ডুমডুমাৰ ৰূপাইৰ টিম শৰ্মা নামৰ এগৰাকী ক্ষুদ্ৰ চাহ খেতিয়কে নিজৰ চাহ বাগিচাত শিশু শ্ৰমিক নিয়োগ কৰি শিশু সকলক অতি কম মজুৰিৰে কাম কৰোৱাই মুনাফা আদায় কৰাৰ ঘটনা পোহলৈ আহিছে ৷
অসম চাহ জনজাতি ছাত্ৰ সন্থাৰ স্থানীয় গোটে এই সন্দৰ্ভত খবৰ লাভ কৰি বাগিচাখনত অভিযান চলাই ছয় গৰাকী কন্যা শিশু শ্ৰমিক উদ্ধাৰ কৰে ৷ আশ্বৰ্যজনক ভাৱে 9 বছৰৰ পৰা 12 বছৰ বয়সৰ কন্যা শিশু শ্ৰমিক সকলক দিনটো পাত চিঙাৰ বাবদ দিয়া নহয় উচিত প্ৰাপ্য ৷ সামন্তৰালকৈ নিয়মীয়া প্ৰাপ্তবয়স্ক শ্ৰমিক সকলক মাত্ৰ 120 টকা মজুৰি প্ৰদান কৰি তেঁওলোকক ৰেচন,ভৱিষ্যত নিধি,গ্ৰেছউটি, চিকিৎসা সেৱা আদি সকলো ধৰণৰ প্ৰাপ্যৰ পৰা বঞ্চিত কৰি ৰাখিছে ক্ষুদ্ৰ চাহ খেতিয়ক গৰাকীয়ে ৷
ইফালে বাগিচাখনৰ শ্ৰমিকে জানিবলৈ দিয়া মতে, বাগিচাখনৰ স্বত্বাধিকাৰী টিম শৰ্মাই দীৰ্ঘদিনৰ পৰা বোনাচ দিয়াৰ প্ৰতিশ্ৰুতি দি শ্ৰমিকৰ দৰমহাৰ পৰা 10 টকাকৈ কৰ্তন কৰি আহিছে ৷
ইতিমধ্যে চাহ জনজাতি ছাত্ৰ সন্থাই শিশু শ্ৰমিক নিয়োজিত কৰাৰ বাবে টিম শৰ্মা নামৰ লোকজনৰ বিৰুদ্ধে ডুমডুমা থানাত এজাহাৰ দাখিল কৰিছে ৷ কিন্তু এইসময়ত সকলোৰে মনত প্ৰশ্ন উদয় হৈছে যে, শিশু শ্ৰমিক নিয়োগ কৰি মুনাফা আদায় কৰা টিম শৰ্মা নামৰ লোক জনৰ বিৰুদ্ধে প্ৰশাসনে উচিত ব্যৱস্থা গ্ৰহণ কৰিব নে ? ক্ষুদ্ৰ চাহ বাগিচা সমূহত কৰ্মৰত শ্ৰমিক সকল আৰু কিমান দিনলৈ শোষনৰ বলি হৈ থাকিব ?
এই সমূহ বিষয়ত শ্ৰমিক ইউনিয়ন বা চৰকাৰে কি পদক্ষেপ গ্ৰহণ কৰে সেইয়া সময়তহে পৰিলক্ষিত হ'ব ৷
লগতে পঢ়কঃ কোনে চকুলো মচিব লাইকা-দধিয়াবাসীৰ ?
