তিনিচুকীয়া, 31 জুলাই: সমগ্ৰ দেশৰ লগতে ৰাজ্যত অব্যাহত থকা ক'ভিড ভয়াৱহতাৰ মাজতে উজনিত সক্ৰিয় হৈছে বৃহৎ গাড়ী চুৰি চক্ৰ ৷ শেহতীয়াকৈ তিনিচুকীয়া আৰক্ষীৰ অভিযানত জালত পৰিছে বৃহৎ গাড়ী চুৰি চক্ৰ ৷ গাড়ী চুৰি চক্ৰটোৰ পৰা জব্দ কৰা হৈছে 10 খনকৈ বিলাসী চুৰি গাড়ী ৷ তিনিচুকীয়া, ডিব্ৰুগড় আৰু শিৱসাগৰ জিলাত অতি কৌশলেৰে জাল পেলাইছে এই গাড়ী চুৰি চক্ৰটোৱে ৷
উল্লেখ্য যে, তিনিদিন ধৰি চলা অভিযানত তিনিচুকীয়া আৰক্ষীয়ে বিভিন্ন স্থানৰ পৰা উদ্ধাৰ কৰিছে এই দহখন গাড়ী ৷ উদ্ধাৰ হোৱা দহখন গাড়ী বিভিন্ন প্ৰকাৰৰ ৷ আৰক্ষীয়ে জনোৱা অনুসৰি, প্ৰথমে গাড়ী মালিকৰ পৰা দীঘলীয়া ভাড়া লৈ জালিয়াতিৰে নথি-পত্ৰ সলনি কৰি বিভিন্ন ঠাইত গাড়ীসমূহ বিক্ৰী কৰে চুৰি চক্ৰটোৱে ৷ এই ঘটনা সন্দৰ্ভত ইতিমধ্যেই তিনিচুকীয়া থানাত ৰুজু হৈছে এক গোচৰ ৷
এই গাড়ী চুৰি কাৰ্যৰ সন্দৰ্ভত তিনিচুকীয়াৰ আৰক্ষী অধীক্ষক দেৱজিৎ দেউৰীয়ে যথেষ্টখিনি গুৰুত্বপূৰ্ণ তথ্য প্ৰকাশ কৰিছে ৷ লগতে পৰৱৰ্তী পৰ্যায়ত গাড়ী চুৰি চক্ৰটো উৎখাতৰ বাবে আৰক্ষীৰ অভিযান অব্যাহত থাকিব বুলি সংবাদ মাধ্যমৰ আগত অৱগত কৰে আৰক্ষী অধীক্ষকগৰাকীয়ে ৷
উল্লেখ্য যে, ক'ভিড পৰিস্থিতি নিয়ন্ত্ৰণৰ বাবে ৰাজ্যত জাৰি হৈ থকা ক'ভিড নীতি আৰু আংশিক লক ডাউনৰ সুযোগ গ্ৰহণ কৰি ৰাজ্যত সক্ৰিয় হৈ উঠিছে একাংশ দুষ্ট চক্ৰ ৷ ক'ভিড সৃষ্ট পৰিৱেশৰ সুবিধা লৈ এই চক্ৰবোৰে নিতৌ সংঘটিত কৰিছে বিভিন্ন ধৰণৰ অপৰাধজনিত ঘটনা ৷ ইয়াৰ মাজতে এই চক্ৰবোৰৰ বিৰুদ্ধে অভিযান অব্যাহত ৰাখিছে অসম আৰক্ষীয়ে ৷ আৰক্ষীৰ অভিযানত জালত পৰিছে বহু অপৰাধী ৷
লগতে পঢ়কঃ লাইলাপুৰ কাণ্ডক লৈ ক্ষুব্ধ বদৰুদ্দিন আজমল
