নিউজ ডেস্ক, 2 নৱেম্বৰ: বুঢ়ী আইৰ সাধু, অসমীয়াৰ বাবে অতি পৰিচিত ৰসৰাজ লক্ষ্মীনাথ বেজবৰুৱাৰ এই অমৰ সৃষ্টি (Burhi Aair Sadhu) ৷ মূলতঃ শিশুৰ বাবে ৰসৰাজে ৰচনা কৰা এই গ্ৰন্থখনে কিন্তু শিশুৰ পৰা বৃদ্ধলৈ সকলোকে আমোদ যোগায় ৷ বৰ্তমান সময়ত কাৰ্টুন সমূহ শিশুৰ যেনেকৈ অতি প্ৰিয়, তেনেকৈ এই বুঢ়ী আইৰ সাধুত থকা সাধু সমুহো কিন্তু অতিকৈ ৰসাল (Assamese famous story book Burhi Aair Sadhu) ৷ ইতিমধ্যে ইংৰাজী ভাষাত উপলব্ধ হোৱাৰ পাচত এইবাৰ স্পেনিছ ভাষাত উপলব্ধ হ’ল বুঢ়ী আইৰ সাধু ৷
বুঢ়ী আইৰ সাধুক স্পেনিছ ভাষালৈ অনুবাদ কৰিছে অসমৰ তিনিচুকীয়া জিলাৰ ডুমডুমাৰ ৰূপাই চাইডিং বিষ্ণু নগৰৰ যুৱক তন্ময় সোণোৱালে (Burhi Aair Sadhu published in Spanish language) ৷ অসম সন্তান তন্ময় সোণোৱালৰ প্ৰশংসনীয় প্ৰচেষ্টাত এতিয়া বিদেশতো সমাদৃত হৈছে ৰসৰাজৰ অমৰ সৃষ্টি ৷ ইতিমধ্যে ইন্টাৰনেট, অনলাইন শ্বপিং এপ তথা দেশ-বিদেশৰ বিভিন্ন কিতাপৰ বিপনীত উপলব্ধ হৈছে স্পেনিছ ভাষাৰ বুঢ়ী আইৰ সাধু ৷
প্ৰায় দুবছৰীয়া আশাশুধীয়া প্ৰচেষ্টাৰ অন্তত এইদৰে স্পেনিছ ভাষাত বুঢ়ী আইৰ সাধু মুকলি কৰি দিবলৈ সক্ষম হৈছে তন্ময় (Tanmoy Sonowal Translated Burhi Aair Sadhu to Spanish) ৷ স্পেনিছ ভাষাত কিতাপখনৰ নাম হৈছে Cuentos De La Abuela অৰ্থাৎ আইতাকৰ কাহিনী ৷
1994 চনত তিনিচুকীয়া জিলাৰ ডুমডুমাৰ ৰূপাই চাইডিঙত জন্মগ্ৰহণ কৰা তন্ময়ে দিল্লীৰ জৱাহৰলাল নেহৰু বিশ্ববিদ্যালয়ত বৈদেশিক ভাষা-সাহিত্য বিষয়ত স্নাতকোত্তৰ ডিগ্ৰী লাভ কৰিছিল ৷ তেতিয়াই আন কেইবাটাও ভাষাৰ লগতে স্পেনিছ ভাষাটোও নিজৰ আয়ত্বলৈ আনে তন্ময়ে ৷ 2020 চনত বিশ্বৰ তৃতীয় বহুল প্ৰচলিত স্পেনিছ ভাষালৈ বুঢ়ী আইৰ সাধু অনুবাদৰ কাম তেওঁ আৰম্ভ কৰিছিল ৷
স্পেনিছ ভাষালৈ অনুবাদ কৰা বুঢ়ী আইৰ সাধুৰ বেটুপাত অংকন কৰিছে তেওঁৰ জ্যেষ্ঠ ভাতৃ ৰাজ সোণোৱালে (Front cover of Burhi Aair Sadhu) ৷ অসমীয়া সাহিত্যক বিশ্বত প্ৰতিষ্ঠা কৰাৰ মানসেৰেই এই অনুবাদ কৰা বুলি জনাইছে তন্ময় সোণোৱালে ৷ উদীয়মান লেখক গৰাকীয়ে আৰু জানিবলৈ দিয়া মতে আগন্তুক ক'লকাতা আন্তৰ্জাতিক গ্ৰন্থমেলাতো উপলব্ধ হ'ব স্পেনিছ ভাষাৰ বুঢ়ী আইৰ সাধু ৷
ব্লু ৰ'জ ওৱান পাব্লিকেছনছে প্ৰকাশ কৰি উলিওৱা এই গ্ৰন্থখন ইতিমধ্যে উপলব্ধ হৈছে অনলাইনতো ৷ কিতাপ খনৰ দাম ভাৰতীয় মূল্যত 450 টকা ধাৰ্য কৰা হৈছে ৷ তন্ময় সোণোৱালৰ এই প্ৰচেষ্টাক শলাগ লৈছে বিভিন্নজনে ৷ তন্ময়ৰ দৰে যুৱকৰ এই প্ৰচেষ্টাৰ বাবেই আজি বিদেশৰ মানুহেও সোৱাদ ল’ব পাৰিছে ৰসৰাজ লক্ষ্মীনাথ বেজবৰুৱাৰ এই অমৰ সৃষ্টিৰ ৷
লগতে পঢ়ক: Birthday of Aishwarya Kakati: প্ৰবীন নাট্যকাৰ ঐশ্বৰ্য কাকতিৰ ৭৯ সংখ্যক জন্মদিন
