তিনিচুকীয়া, 21 জুন: চাহ জনজাতিৰ ছাত্ৰ ছাত্ৰীসকলৰ শিক্ষাৰ অধিকাৰ সুনিশ্চিত কৰা, উচ্চ আৰু উচ্চতৰ মাধ্যমিক পৰীক্ষাত উত্তীৰ্ণ ছাত্ৰ ছাত্ৰীসকলৰ উচ্চ শিক্ষানুষ্ঠানত নামভৰ্তিৰ ব্যৱস্থা কৰাৰ দাবীত বৃহস্পতিবাৰে অসম চাহ জনজাতি ছাত্ৰ সন্থাৰ তিনিচুকীয়া সমিতিয়ে জিলা উপায়ুক্তৰ কাৰ্যালয়ৰ সন্মুখত 3 ঘন্টীয়া ধৰ্ণা কাৰ্যসূচী ৰূপায়ণ কৰে | ছাত্ৰ সংগঠনৰ নেতৃত্বই অভিযোগ কৰি কয় যে নিৰ্বাচনৰ পূৰ্বে বিজেপি চৰকাৰে চাহ বাগিচা অঞ্চলত 100 খন হাইস্কুল স্থাপনৰ প্ৰতিশ্ৰুতি দিয়ে যদিও বৰ্তমান পৰ্যন্ত প্ৰতিশ্ৰুতি পূৰণ বাবে কোনো বিহিত ব্যৱস্থা গ্ৰহণ কৰা নাই |
সংগঠনটোৱে চৰকাৰক ঘোষণা কৰা অনুসৰি চাহ বাগিছা অঞ্চলত 100 খন হাইস্কুল শীঘ্ৰে স্থাপন কৰাৰ দাবী জনায় | ইয়াৰ লগতে বাগিচা অঞ্চলত থকা প্ৰাথমিক আৰু মাধ্যমিক বিদ্যালয়সমূহ চৰকাৰীকৰণৰ ব্যৱস্থা কৰা, উচ্চ আৰু উচ্চতৰ মাধ্যমিক পৰীক্ষাত উত্তীৰ্ণ ছাত্ৰ ছাত্ৰীসকলক শীঘ্ৰে নামভৰ্তিকৰণৰ ব্যৱস্থা কৰা, তিনিচুকীয়াৰ ডুমডুমা অঞ্চলত মহাবিদ্যালয়ৰ কাম কাজ শীঘ্ৰে আৰম্ভ কৰাৰ বাবে সংগঠনটোৱে দাবী জনায় | চৰকাৰে শীঘ্ৰে এই ক্ষেত্ৰত বিহিত ব্যৱস্থা গ্ৰহণ নকৰিলে আটছাই অনাগত দিনত তীব্ৰ গণতান্ত্ৰিক আন্দোলন গঢ়ি তোলাৰ হুংকাৰ দিয়ে |
