ধুবুৰী, 12 অক্টোবৰঃ 25 বছৰ সম্পূৰ্ণ কৰিলে মানকাচৰ জিলাৰ হাটশিঙিমাৰী ৰেইনবো ইংলিছ একাডেমীয়ে ৷ বিদ্যালয়খনৰ ৰূপালী জয়ন্তীৰ লগত সংগতি ৰাখি বিগত তিনিদিন ধৰি বিভিন্ন ধৰণৰ অনুষ্ঠানৰ আয়োজন কৰা হয় ৷ ৰূপালী জয়ন্তীৰ অন্তিম দিনা মুকলি সভাত মুখ্য অতিথি হিচাপে উপস্থিত থাকে একাডেমিখনৰে প্ৰাক্তন ছাত্ৰ তথা ইছৰোৰ বৈজ্ঞানিক ইজাছ আহমেদ ৷ লগতে উপস্থিত থাকে জিলা উপায়ুক্ত আতিকা ছুলতানা, মানকাচৰৰ প্ৰাক্তন বিধায়ক জাবেদ ইছলাম ৷
উল্লেখ্য যে, ইছৰোৰ বৈজ্ঞানিক ইজাছ আহমেদে 2009 বৰ্ষত উক্ত একাডেমিখনৰে পৰা উচ্চতৰ মাধ্যমিক চূড়ান্ত পৰীক্ষাত অষ্টম স্থান দখল কৰি জিলাখনলৈ সুনাম কঢ়িয়াই আনিছিল ৷ আনহাতে, যুৱ বৈজ্ঞানিক গৰাকীয়েও নিজ বিদ্যালয়ত উপস্থিত হ’বলৈ পাই আনন্দ প্ৰকাশ কৰে ৷ বৈজ্ঞানিকজনক লগ পাই আৰু তেখেতৰ সৈতে মত বিনিময় কৰি উৎফুল্লিত হৈ পৰে বিদ্যালয়খনৰ ছাত্ৰ-ছাত্ৰী আৰু শিক্ষসকল ৷
