তেজপুৰ,২৭আগষ্ট : উচ্চতম ন্যায়ালয়ৰ তৎপৰতাত চলি থকা ৰাষ্ট্ৰীয় নাগৰিকপঞ্জীৰ উন্নীতকৰণ কাম ইতিমধ্যে সমাপ্তিৰ দিশত । অহা ৩১ আগষ্টত প্ৰকাশ পাব এনআৰচিৰ চূড়ান্ত খচৰা । কিন্তু এতিয়াও ভুৱা লিগেছীৰে নিজৰ নাম এনআৰচিত অন্তৰ্ভূক্ত কৰিবলৈ অহৰহ চেষ্টা অব্যাহত ৰাখিছে একাংশ অসাধু লোকে । এনে এক ঘটনা সংঘটিত হোৱাৰ অভিযোগ শোণিতপুৰ জিলাত ।শোণিতপুৰ জিলাৰ কেহেৰু খন্দাৰ প্ৰয়াত নৰেশ দাসৰ তিনি পুত্ৰ শান্তিৰাম দাস ,প্ৰশান্ত দাস আৰু সুশান্ত দাস । নৰেশ দাসৰ লিগেছী নম্বৰ (3060 204111 33501) । কিন্তু প্ৰয়াত নৰেশ দাসৰ লিগেছী ব্যৱহাৰ কৰি প্ৰয়াত পৰেশ দাসৰ পুত্ৰ নিৰঞ্জন দাসে NRC ত নিজৰ নাম অন্তৰ্ভূক্ত কৰাৰ অভিযোগ উঠিছে । আনহাতে এই বিষয়ে জিলা উপায়ুক্তৰ পৰা আৰম্ভ কৰি বিভিন্ন ঠাইত বহুবাৰ অভিযোগ দাখিল কৰিলে প্ৰয়াত নৰেশ দাসৰ পুত্ৰ সকলে । কিন্তু NRC ৰ খচৰা প্ৰকাশৰ মাত্ৰ 4 দিন পূৰ্বেও ইয়াৰ কোনো সমাধান নাপালে নৰেশ দাসৰ পুত্ৰ সুশান্ত দাসে৷
আনহাতে , 5051 কেন্দ্ৰৰ এনআৰচিৰ দায়িত্বত থকা বিষয়া জনে অভিযোগ প্ৰতি অভিযোগেৰে বিষয়টো মিলাই ল'বলৈ কোৱাত ক্ষোভিত হৈ পৰে নৰেশ দাসৰ পুত্ৰ সুশান্ত দাস । ইপিনে এনে ঘটনাই NRC ৰ কাম কাজত হোৱা বিসংগতিৰ লগতে ভুৱা লিগেছীৰে বহু বিদেশী নাগৰিকৰ নাম NRC ত অন্তৰ্ভূক্ত হোৱাৰ কথাই প্ৰমাণ কৰিছে৷
