তেজপুৰ, 11 অক্টোবৰ : শ্বহীদ নগৰী ঢেকিয়াজুলিৰ শ্বহীদ ময়দানত দেওবাৰে আত্মপ্ৰকাশ ঘটিল আন এটা ৰাজনৈতিক দলৰ ৷ অসমত বসবাস কৰা হিন্দু-বঙালী সকলৰ সাংবিধানিক তথা মৌলিক অধিকাৰ ৰক্ষাৰ স্বাৰ্থত অসম বাঙালী যুৱ ছাত্ৰ ফেডাৰেচনে ঢেকিয়াজুলি চহৰৰ মাজ মজিয়াস্থিত শ্বহীদ ময়দানত অনুষ্ঠিত কৰিছিল জাতীয় অভিৱৰ্তন ৷ এই অভিৱৰ্তনতে গঠন হ’ল "ভাৰতীয় গণ পৰিষদ" ৰ ৷ নৱগঠিত দলটোৰ কৰ্মকৰ্তাসকলে ৫০ খনতকৈ অধিক আসনত প্ৰতিদন্দ্বিতা কৰাৰ লগতে, ২০ খনতকৈয়ো অধিক আসন লাভ কৰি ২১ ত চৰকাৰ গঠনৰ ক্ষেত্ৰত মুখ্য ভূমিকা গ্ৰহণ কৰিব বুলি মন্তব্য কৰে সভাখনত ৷
কেইবা শতাধিক লোকৰ সমাৱেশত অনুষ্ঠিত অভিৱৰ্তন খন ঠিকেই চলি আছিল ৷ দলটোৰ গুণানুকীৰ্তনৰ লগতে, আগন্তুক নিৰ্বাচনত জয়ী হ'লে তেওঁলোকে কৰিবলগীয়া এজেণ্ডা সমূহৰ ব্যাখ্যালৈ সকলো চলি আছিল সুচাৰুভাৱে ৷ কিন্তু তাৰ মাজতে ঘটিল এক অঘটন ৷ অভিৱৰ্তন চলি থকা সময়তে সভাস্থলীত কোনো অজ্ঞাত লোকে উৰুৱাই থৈ গ'ল আলফা (স্বা) ৰ পতাকা ৷ যাক লৈ এক উত্তপ্ত পৰিস্থিতিৰ সৃষ্টি হয় অভিৱৰ্তনস্থলীত ৷ পৰৱৰ্তী সময়ত আৰক্ষীয়ে উক্ত পতাকাখন আঁতৰাই দিয়ে আৰু কোনো দুষ্ট চক্ৰই এনে কাৰ্য সংঘটিত কৰিছে বুলি জানিবলৈ দিয়ে শোণিতপুৰ জিলাৰ আৰক্ষী অধীক্ষক মুগ্ধ জ্যোতি দেৱ মহন্তই ৷
লগতে পঢ়ক: কৰ্মীৰ পদত্যাগৰ বাবে হাগ্ৰামা মহিলাৰী দায়ী: প্ৰমোদ বড়ো
