তেজপুৰ, ২০ জুন: ৰাজ্যৰ অন্যান্য প্ৰান্তৰ লগতে তেজপুৰতো কলাগুৰু বিষ্ণু প্ৰসাদ ৰাভাৰ ৫২ সংখ্যক মৃত্যু দিৱস অনুষ্টুপিয়াকৈ পালন কৰা হয় । সমগ্ৰ অসমতে শিল্পীজনৰ প্ৰতি শ্ৰদ্ধাঞ্জলি জনাই ২০ জুনৰ দিনটো 'ৰাভা দিৱস' হিচাপে পালন কৰা হয় । ৰাভাৰ মৃত্যুবাৰ্ষিকী উপলক্ষে সমগ্ৰ ৰাজ্যৰ লগতে ৰাভাৰ জ্যেষ্ঠ পুত্ৰ পৃথ্বিৰাজ ৰাভাই পিতৃক সোঁৱৰণ কৰে ৷ ৰেড জ’নৰ মাজতে তেজপুৰ কলিবাৰীত ৰাভাৰ সমাধিস্থলীত বন্তি প্ৰজ্বলন কৰি কলাগুৰুৰ জ্যেষ্ঠ পুত্ৰ তথা তেজপুৰৰ বিধায়ক পৃথ্বিৰাজ ৰাভাই পিতৃক স্মৰণ কৰে ৷
শোণিতপুৰ জিলাৰ উপায়ুক্ত ভূপেশ চন্দ্ৰ দাসেও পৃথ্বিৰাজ ৰাভাৰ লগত কলাগুৰুৰ সমাধিস্থলীত উপস্থিত হৈ তেখেতক শ্ৰদ্ধাঞ্জলি জ্ঞাপন কৰে । ইয়াৰ লগতে তেজপুৰ আঞ্চলিক ছাত্ৰ সন্থা আৰু তেজপুৰৰ অন্যান্য লোকসকলে কলিবাৰীত কলাগুৰুৰ সমাধিস্থলীত শ্ৰদ্ধাঞ্জলি জ্ঞাপন কৰে ।
উল্লেখ্য যে, এইবাৰ ক’ভিড-১৯ ৰ ভয়াৱহ সংক্ৰমণৰ মাজতো সকলোৱে সৈনিক শিল্পীগৰাকীক শ্ৰদ্ধাৰে সুঁৱৰিছে । বছৰ বছৰ ধৰি উপেক্ষিত কলাগুৰুৰ সংগ্ৰহালয় আজিও নিৰ্মাণ নোহোৱাৰ বাবে জ্যেষ্ঠ পুত্ৰ পৃথ্বিৰাজ ৰাভাই এইবাৰ চৰকাৰৰ ভিতৰত থাকি আধৰুৱা কাম সম্পন্ন কৰাৰ প্ৰতিশ্ৰুতি দিয়ে ।
আনহাতে, তেজপুৰ সাহিত্য সভাই এক কাৰ্যসূচীৰ জৰিয়তে কলাগুৰু বিষ্ণু প্ৰসাদ ৰাভাক স্মৰণ কৰে । এই স্মৃতিচাৰণ অনুষ্ঠানত তেজপুৰ সাহিত্য সভাৰ সভাপতি, সম্পাদক আৰু সাংস্কৃতিক কৰ্মীসকলো উপস্থিত থাকে । আনহাতে তেজপুৰ চহৰৰ মাজ মজিয়াত থকা ৰূপকোঁৱৰৰ কৰ্মস্থলী পকিতো কলাগুৰুৰ মৃত্যু তিথিত তেখেতক স্মৰণ কৰা হয় । উল্লেখ্য যে, কলাগুৰুৰ বহু আপুৰুগীয়া সম্পত্তি এই পকিতে সংৰক্ষণ কৰি ৰখা হৈছে ।
লগতে পঢ়ক : জৰাজীৰ্ণ অৱস্থাত কলাগুৰুৰ সমাধিস্থলী
